Македонија не ветила рок за името

Според Милошоски и Мета, мислењето на Хаг за Косово нема да ги промени границите во регионот

Тамара Грнчароска


Решението на спорот за името не го ограничуваат рокови, туку недостаток на политичка волја, прагматизам и инсистирање на одредени ирационални позиции што се тешко разбирливи во 21 век, изјави вчера македонскиот министер за надворешни работи, Антонио Милошоски, наведувајќи дека Македонија никому не му ветила до кога ќе го реши спорот со Грција. „Македонија останува посветена, со добра волја и намера да ги продолжи разговорите во македонско-грчкиот дијалог за надминување на билатералниот спор“, изјави вчера Милошоски, по средбата со албанскиот колега Илир Мета во Скопје.

Тој се осврна и на состанокот на Советот за стабилизација и асоцијација, кој се одржа еден ден претходно во Брисел. „Македонија доби висока и позитивна оцена за реформскиот процес“, информираше Милошоски. Тој, на прашањето дали тоа ќе значи и приближување до датумот за преговори, одговори дека од Брисел се вратиле со три пораки: реформите се добри и треба да продолжат, политичкиот дијалог не е одговорност само на власта, туку и на опозицијата и ако продолжи ваквото темпо на реформи и оваа година ќе се потврди препораката за старт на преговорите.

Македонскиот шеф на дипломатија по средбата со албанскиот колега изрази задоволство од одличните политички односи што Македонија ги има со Албанија, што треба да биде пример за зголемување на енергетската и на инфраструктурната соработка меѓу двете земји, особено за реализацијата на Коридор 8.

Мета од своја страна побара целосно и ефикасно спроведување на Охридскиот договор, кој, како што рече, имал битно значење за стабилноста на Македонија и за нејзината европска агенда. Притоа, тој истакна дека на средбите со албанските политички партии во земјава ќе побара тие да придонесуваат за стабилноста и за европската интеграција на државата, како и за унапредување на своите права преку учество во институциите на системот.

Двајцата министри позитивно се произнесоа по мислењето на Меѓународниот суд на правдата за статусот на Косово. „Позитивно ја оценуваме одлуката, односно мислењето на Меѓународниот суд на правдата во однос на косовското прашање, што беше поведено од страна на Србија и цениме дека ваквото мислење оди во прилог на отворањето на едно ново поглавје на дијалог за зголемена стабилност и соработка во регионот“, рече Милошоски. Мета, пак, смета дека мислењето на Судот ќе и' помогне на Србија да тргне по својот европски пат. И Милошоски и Мета го споделија ставот дека мислењето на Судот за Косово нема да предизвика редефинирање на границите во регионот, туку оти иднината треба да биде нивното бришење. „Решението не е во ирационални политики, туку во обединување и соработка во регионот во кој границите нема да бидат важни“, рече Милошоски, притоа барајќи поддршка од ЕУ за тоа.

На средбата Милошоски - Мета било разговарано и за положбата на малцинствата во двете земји, при што албанскиот шеф на дипломатијата изјави дека Албанија прави заложби за давање повисоки права на малцинствата, вклучително и на македонското малцинство, во согласност со европските стандарди за права на малцинствата.