На земјоделци од пелагониските села Дедебалци, Ивањевци и Далбеговци партиски војници им барале десет проценти од парите за откупените количества тутун

БИТОЛА - Владата на Никола Груевски сака да го реализира „Скопје 2014“ со маката и потта на пелагониските земјоделци. Партиски војници на власта ги рекетирале тутунарите од селата Дедебалци, Ивањевци и Далбеговци за грандиозниот проект „разубавување на метрополата“. Притоа, им барале процент од парите што ги добиле за откупениот тутун, обвинуваат пелагониските земјоделци.

За најновата честитка од Владата тутунарите не сакаат јавно да зборуваат оти стравуваат за својата егзистенција. Но, тие не можеа да го скријат гневот и разочарувањето од власта пред своите роднини и пријатели. Дел од оние на кои им биле побарани пари се пожалиле дури и на лидерот на партијата Обединети за Македонија, Љубе Бошкоски, при неговата посета на пелагониските села.

Локалните власти од пелагониските општини демантираат дека проектот „Скопје 2014“ ќе се финансира од џебот на тутунарите. Тие реагираат дека опозиционите политичари се нафрлиле на Пелагонија за да ќарат на маката на земјоделците иако не нудат никакво решение за нивните проблеми.

Земјоделците од Пелагонија тврдат дека гавази од партијата на власт оделе од куќа на куќа кај тутунари кои веќе го предале тутунот. Притоа, ги советувале десет отсто од парите што ги заработиле со продажба на жолтото злато да донираат за доброто на државата, а за тоа да не зборуваат. Ги убедувале дека тоа не се многу пари за нив, но дека придобивките од нивната хуманост ќе бидат далеку поголеми. Меѓутоа, изнудувачите, сепак, биле претпазливи, чукнале само на вратите на своите членови и кај селаните за кои сметале дека се партиски неопределени. Овој пат ги поштедите членовите и симпатизерите на опозиционите партии.

„Во Пелагонија, откако дојде премиерот Груевски да пушта водоводи, тутунарите се' почесто се поплакуваат дека им се бара дури десет отсто од заработените пари за реколтата 2009 година. Можеби тоа не се многу пари. Ама има семејства што зеле 300 илјади денари од тутунот и не е малку да одвојат арач од 30 илјади денари. Тоа се пари за тримесечни сметки на едно семејство. А, зошто да ја дадат џабе маката за некаков барок во Скопје, за нешто што не го разбираме што значи“, револтирано зборува Кире Чагорски, земјоделец од селото Могила.

Пелагониските тутунари решија да прозборат за маките и пред опозиционите политичари. Како што велат тие, при последната посета на премиерот Никола Груевски во Пелагонија не стасал да ги слушне нивните проблеми.

„Кога ги прашав при мојата посета на Ивањевци дали тутунарите се задоволни од откупот на тутунот, рекоа дека се задоволни. Но, една госпоѓа ме тргна зад камерите и ми раскажа. Кога го предале тутунот, без оглед на килограмите, дали се сто или двесте, државата им побарала на сметката за проектот ‘Скопје 2014‘ да префрлат по 2.000 денари. Замислете Ивањевци да плаќа за проектот на Никола Груевски“, рече пред жителите на Пелагонија лидерот на Обединети за Македонија, Љубе Бошкоски, кој се' почесто е во обиколка на овдешните села.

Меѓутоа, за градоначалниците на двете пелагониски општини Могила и Новаци ваквите поплаки на тутунарите не држат место. Локалните власти од ВМРО-ДПМНЕ категорично негираат дека на тутунарите им се бараат пари за „Скопје 2014“. Напротив, тие сметаат дека имало некакво недоразбирање за обврските што требало да ги намират земјоделците спрема државата.

„Таква работа не постои. Најверојатно, ја помешале работата затоа што на нерегистрираните земјоделци, односно на тутунарите им се бара да платат данок на добивка. До 300.000 денари основицата за пресметување е десет отсто и тутунарите тука ја помешале работата. Она што го тврдат лидери на опозицијата е несериозна работа и во функција на политички маркетинг. Кога политичарите се во опозиција едно ветуваат, а дури кога ќе дојдат на власт, гледаат дека самите го наметнале проблемот“, објаснува Славко Велески, градоначалник на Општина Могила.

Локалната власт од Новаци слушнала за ваквите гласишта низ Пелагонија, дека на тутунарите, но селективно им побарале пари за проектот „Скопје 2014“. Но, од Новаци сметаат дека овој проблем не е во нивниот двор и дека ги засега селата во соседната општина Могила. (А.Б.)