Уапсени 26 полицајци и девет цариници осомничени дека земале мито

Акцијата била спроведена на премините Табановце, Меџитлија, Деве Баир и Богородица

ГОРАН АДАМОВСКИ
ДАНИЕЛА ТРПЧЕВСКА

Четириесетина царински службеници се уапсени во организирана акција на неколку сектори за борба против корупцијата во земјава. За земање мито се осомничени 26 полицајци, девет цариници и тројца угостителски работници кои, според МВР, биле посредници во нечесната игра која се случувала на граничните премини Табановце, Меџитлија, Деве Баир и Богородица.

Бројката на цариници и полицајци за кои постојат сомневања дека земале мито се најавува дека ќе биде двојно зголемена, оти акцијата ќе трае и во време на викендов. Процените се дека практично тројца од четворица вработени на премините Табановце, Меџитлија, Деве Баир и Богородица го злоупотребиле службениот кодекс. Меѓу уапсените има и раководители на смени, како и полициски старешини што работеле на четирите премини кои беа на цел на специјалните единици на МВР. Истрагата покажала дека службениците „оперирале“ само на граничните премини каде што биле вработени и не биле поврзани во организиран канал со своите колеги од другите гранични премини. И покрај големите апсења, четирите премини работат нормално.

Акцијата била подготвувана неколку месеци од страна на Одделот за организиран криминал, Одделот за посебни акции на МВР, како и Секторот за внатрешна контрола и професионални стандарди при МВР. Со најсовремена техника било организирано следење на сите поголеми премини во земјава, откако до надлежните протекле информации за континуиран пропуст на криминал од страна на царински службеници.

„На преминот Богородица се уапсени 13 полицајци, шест на Меџитлија, на Деве Баир се уапсени 7 полицајци и шест цариници и на Табановце уште тројца полицајци. Во акцијата, во која учествува 400 полицајци, уапсени се и тројца угостителски работници. Нивната задача била да бидат посредувачи во примањето поткуп“, изјави Воислав Зафировски од Секторот за внатрешна контрола при МВР. При истрагата, на премините кон Косово и кон Албанија не биле утврдени случаи со поткуп.

Полицијата најавува нови детали околу случајот в понеделник, оти акцијата се' уште трае. Неофицијално, цариниците и полицајците се фатени на дело додека примаат поткуп, а сето тоа било снимено со камера од агентите на МВР, кои биле инфилтрирани во царинскиот синџир. Освен што примале на рака, од полиција велат дека службениците се нафаќале да средат и разни документи со кои се легализирале секакви пратки со дозволена и недозволена содржина. Дел од поткупливиот материјал е пронајден во службените простории на граничните премини, но вршен е претрес и во возилата и во домовите на уапсените примачи на мито. Уапсените службеници не соработувале по премини. Акцијата ќе продолжи и на другите премини.

„Воопшто не стравуваме дека откако се дозна за акцијата, поткупливите службеници од другите премини ќе успеат да се спасат. За сите нив е собрана потребната документација, а според процедурата, земјава не можат да ја напуштат без да добијат дозвола“, вели Зафировски.

Акцијата на полицијата вчера ја поддржа и првиот човек на Царината, Ванчо Каргов. Тој вели дека станува збор исклучиво за акција на МВР, во која царината не учествувала, но дека често се дискутирало дека треба да се преземат активности за спречување на криминалот на граничните премини.

„Полициската акција ја поздравуваме и немаме причина да се сомневаме дека МВР има обезбедено докази против царинските службеници кои се осомничени дека на неколку гранични премини земале мито од граѓаните“, вели Каргов во изјавата за „Утрински весник“.

Тој потврдува дека и досега во царината постоеле сознанија за појава на мито и корупција за некои од вработените службеници. Поплаки често се случувало да пристигнуваат и од страна на граѓани кои го искусиле ваквото горко искуство.

„Се јавуваат граѓани кои пријавуваат дека им било побарано мито, но проблемот е што најчесто не можеме да ги докажеме ваквите случаи, оти треба на самото место да биде фатен цариникот кој го побарал тоа“, укажува директорот на Царина. Тој додава дека кај нив се водат дисциплински постапки против цариници за земање мито, но и за несоодветно однесување, но најчесто ваквите случаи завршуваат со парични казни. Каргов вели дека речиси е донесена и пресуда против една цариничка, за која судот утврдил дека е виновна за земање поткуп во висина од 120 евра. Случајот бил пријавен пред два месеца на граничниот премин Табановце.

„Корупцијата многу тешко се докажува, поради што е потребно да се спроведе ваква организирана акција со која ќе се обезбедат материјални докази за пред судот“, вели Каргов. Тој, сепак, укажува дека на одредени гранични премини, особено на Богородица, имаат проблем со недостиг од вработени цариници, оти нивната бројка е мала и се „бројат на прсти“.