Лоши вести за Македонија од Брисел

Португалското претседателство најави дека ноемврискиот извештај нема да биде позитивен

Од нашиот дописник
СЛОБОДАНКА ЈОВАНОВСКА

Извори од португалското претседателство со Европската унија вчера официјално ги распрскаа надежите дека Македонија може да се надева на позитивна вест од ноемврискиот извештај на Европската комисија.

„Португалија ги поддржува напорите на Македонија да се приближи кон Европската унија и нашите идни чекори ќе зависат од процената на ситуацијата на теренот што наскоро треба да ја направи Европската комисија. Последните информации се дека има некои недостатоци во исполнувањето на обврските што ги бараше Европската комисија, па ве охрабруваме да ги остварите потребните реформи во наредниот период“, изјави вчера портпаролот на португалската амбасада при ЕУ, Мануел Карвалјо.

Тој не сакаше да дава детали што е тоа што го прави незадоволен Брисел, потенцирајќи дека, генерално, има позитивен став кон интегрирањето на Македонија во Унијата, дека ја „признаваат како земја-кандидат“, но дека таа треба да направи уште чекори напред за да добие охрабрувачки извештај во ноември.

Извештајот на ЕК за нашата земја треба да почне да се подготвува деновиве, но сигналите се дека тој нема да се разликува многу од заклучоците по последниот дијалог Македонија-ЕУ, бидејќи малку е постигнато од бараните реформи, а забелешките што ги имаше Брисел и натаму важат, со тоа што сега никој не се надева дека ќе се исполнат навреме и дека политичките елити во Скопје ја сфатиле пораката.

Тоа особено важи за политичкиот дијалог и функционирањето на институциите во државата кои последниве месеци се реверзибилни, што е нешто што најмалку сакаат да го видат во Унијата.

Висок европски функционер деновиве изјави дека она што се очекува во Брисел од Македонија и другите земји од Балканот е да покажат кредибилен прогрес, да демонстрираат трајна внатрешна стабилност и видлив економски напредок, а нашата земја од сето тоа може да се протне некако кај последното.

За разлика од Хрватска, која во моментов има, исто така, проблеми на релација со Унијата поради преголемата корупција и спорот со Словенија и Италија околу границата, но никој не му дава гласност на тоа, Македонија нема заштита во Брисел , па ваквите заостанувања се добродојдени за земјите кои имаат резерви кон новите проширувања.

Последната неформална процена од влијателен германски политичар во ЕУ е дека на Македонија ќе и' требаат дваесет години за да ги исполни условите за членство, а други не одат толку далеку, но не се ни обидуваат да дадат прогноза, бидејќи нашата држава ни самата не работи да ја протурка својата кандидатура. Најдобра паралела каков прогрес е направен во Македонија и што може да се очекува во ноември е ако се спомнат забелешките од минатогодишниот извештај на ЕК, кој пак беше доживеан како еден од најлошите што ги доби Македонија досега поради повеќемесечната предизборна парализа во државата.

Од оваа перспектива, некои оцени од тој извештај со тие што се навестија досега од Брисел можат да изгледаат и попозитивни, како таа дека Македонија е на пат да ги исполни политичките критериуми, но темпото на реформи било доста забавено, така што треба да се вложат дополнителни напори. ЕУ тогаш побара конструктивен дијалог во парламентот и меѓу партиите од власта и опозицијата, а сега треба да побара и дијалог меѓу институциите, бидејќи и на таа основа е издевалвирана државата.

Во ланскиот извештај ЕУ забележа некаков прогрес во судските реформи, а сега ќе мора да констатира дека цела година е изгубена за да се изберат неколку судии и се' уште не е направено тоа. Ретерирање ќе има и во однос на односите со Грција, поради провокацијата со аеродромот и спомениците на Александар Македонски.

Некој плус Владата ќе добие за борбата против корупцијата и подобрената економска клима, но порака на дипломатите од Брисел е дека Македонија може да стане Тајван, но сепак политичките критериуми се решавачки за давањето датум и први спомнати во извештајот на Европската комисија.

Што е уште полошо, состојбата во Македонија сега е полоша и од пред два месеца кога беа објавени заклучоците по Советот за стабилизација и асоцијација, бидејќи тие дојдоа по враќањето на ДУИ во парламентот кога Брисел имаше во што да се надева.