18.04.2012, 16:46 Лабуристите убедливо пред конзервативците
Британската лабуристичка партија првпат по парламентарните избори во мај 2010 година има убедлива предност од девет отсто пред партиите на конзервативците и либералдемократите, кои ја сочинуваат актуелната владина коалиција, покажува истражувањето на агенцијата „Популус“. Ако сега би се одржале парламентарни избори, лабуристите на Ед Милибанд би победиле убедливо, добивајќи 42 отсто од гласовите на Британците, ториевците на премиерот Дејвид Камерон би освоиле 33 отсто, додека либералдемократската партија на заменик-премиерот Ник Клег, би добила само 11 отсто од гласовите.
Ваквиот рејтинг на трите главни политички партии во Велика Британија може да се покаже пресуден за делумните локални избори во земјата, што се одржуваат на 3 мај, како и за изборот на градоначалник на Лондон. (МИА)
|
