И зградите во Центар ќе добијат нови фасади

Oпштината ќе има обврска да постави нова термичка фасада, а станарите да си ја заменат старата и дотраена столарија

Бојан Шашевски


Општинарите од Центар преку Акциониот план за енергетска ефикасност ќе овозможат целосно субвенционирање на реконструкцијата на дотраените фасади на дел од колективните станбени згради на општинската територија. Акцентот на ваквиот проект ќе биде заштеда на топлинската енергија, а второстепено значење ќе има разубавувањето на изгледот на зградите. За реализација на проектот Општина Центар има предвидено 500.000 евра од својот буџет.

Со планираната реконструкција општинарите ќе имаат обврска да стават нова термичка фасада, а станарите ќе си ја заменуваат и обновуваат старата и дотраена фасадна столарија. Општината се договори со непрофитната организација „Хабитат Македонија“ преку која станарите ќе аплицираат за програмски заем за замена на фасадите.

Градоначалникот на Центар, Владимир Тодоровиќ, на вчерашната презентација на проектот рече дека денеска ќе биде распишана објава за прибирање барања за реконструкција на фасади. Во јавниот повик ќе бидат наведени правото на учество, критериумите, како и начинот на кој ќе можат Заедниците на станари да поднесат пријави.

„Сакаме да им овозможиме на граѓаните подобри услови за домување во смисла на заштеда на енергија, намалување на трошоците и на загубите на топлинската енергија и на штетните влијанија во атмосферата“, рече Тодоровиќ, додавајќи дека право на учество ќе имаат згради кои се постари од 15 години и имаат од 5 до 10 ката.

Според предвидените критериуми, за реконструкција на фасадата ќе можат да аплицираат зградите кои немаат градежни активности во текот на процесот на аплицирање, каде што најмалку 70 отсто од сопствениците на станови се согласуваат сами да ги променат балконските врати и прозорци, како и исто толкав процент станови да се населени во текот на целата година. Конкурсот ќе трае 60 дена.

„Посебно е потребна промената на термичките фасади, бидејќи директно влијае на буџетот на граѓаните. Станарите ќе имаат една третина помалку трошок за греење“, рече Тодоровиќ и потенцира дека нема да има барокни фасади, туку изгледот на зградите ќе остане приближно ист како досегашниот, но со можност за мали измени во боите и, секако, употреба на подолготрајни материјали.