Прилепскиот театар со „Крпен живот“ ќе го затвори Фестивалот на античка драма

Со претставата „Крпен живот“, вечерва Прилепскиот театар го затвора деветтиот Фестивал на античката драма во Стоби. Публиката ќе има можност на античката сцена, да ја види амбиенталната претстава, работена по текстот на првиот македонски роман на Стале Попов, во драматизација на Блаже Миневски, а во режија на Владо Цветановски.

Актерите во амбиент кој треба да го прикаже некогашниот живот во Мариово, ќе го доловат минатото низ призмата на сегашноста.

Актерската екипа во претставата ја сочинуваат Кирил Ристоски, Игор Трпчески, Зоран Иваноски, Александар Тодески, Димитар Црцороски, Јасмина Мицовска - Станкоска, Наташа Наумоска, Марија Спиркоска - Илијески, Даниела Стојковска, Димитар Ѓорѓиевски, Катерина Чакмакоска, Александар Степанулески и Никола Настоски.

„Крпен живот” лани беше одиграна на „Охридско лето“, годинава беше прикажана во рамки на „Штипско културно лето“, а има најави за гостувања и во други градови во Македонија. (Н.П.)