Третина од Македонците би ја напуштиле државата

Резултати од последното истражување на Балкан Галуп монитор

Од нашиот дописник
Слободанка Јовановска

Брисел - Ако од јануари идната година се укине визниот режим за Македонија, дури 31 отсто од граѓаните би ја напуштиле државата, и во тој поглед од балканските земји пред нас предничат само жителите на Албанија. Европската унија, сепак, нема да се соочи со масовен бран на имигранти како при приемот на Бугарија и на Романија, но процената е дека од над 24 милиони жители на Балканот, над четири милиони посакуваат да си одат од своите држави.

Ова е резултатот од последното истражување на Балкан Галуп монитор, кое има цел да ја претстави состојбата со имиграцијата од балканските земји во моментов и да процени каков ефект ќе има укинувањето на визниот режим на овие земји. Она што е најпроблематично е дека најголем број од идните имигранти би заминале во Германија, во која и без тоа има најголема заедница од Балканот, па отпорот кон укинувањето на визите во оваа земја може да биде зајакнат со овие податоци.

Генерално, мнозинството граѓани во петте држави од Западен Балкан (и Хрватска, која е ставена заради паралела, иако нема визен режим со ЕУ) се незадоволни од својата материјална ситуација и тоа незадоволство расте достигнувајќи 60 отсто од популацијата во Македонија. Како и да е, бројот на оние што веќе имаат конкретни планови да заминат е многу помал и на ниво на шесте земји брои 120.000, од кои само 70.000 ја посакуваат како дестинација Европската унија. Она што е вознемирувачко за Балкан Галуп е фактот дека имигрирањето е начин да најдат воопшто вработување многу Албанци од Македонија, Косово и од Албанија.

Најзагрозени да добијат укинување на визите, и покрај големата медиумска врева, не се Србите, туку граѓаните на БиХ, а зад нив се Албанците и повторно Македонците. Во тој триаголник на земји, всушност, резултатите сугерираат најголеми незадоволства, а со тоа и атмосфера дека некаде надвор има повеќе можности за заработувачка отколку дома. Друг интересен факт од истражувањето на Балкан Галуп е дека по семејство иселениците испраќаат дури 240 евра во Македонија, 160 во Албанија и 300 на Косово и дека во последнава држава дури 81 отсто од семејствата имаат приход од странство.

Посакувани дестинации на Балканците, покрај Германија, се САД, Швајцарија и Италија, а најголем број од нив веќе живеат во Германија, Италија и во Грција. Како куриозитет за балканските граѓани само едно прашање е поважно од укинувањето на визите, а тоа е пресметката со корупцијата на која сигурно треба да и' заблагодарат што, место дома, среќата и егзистенцијата ќе си ги бараат на друго место. Инаку, на презентацијата на Галуп во Брисел беше приреден балкански ручек на кој јадењата, сепак, беа избор од македонската традиционална кујна, а се служеше и македонското вино „т’га за југ“.