Дел од учениците задоцнија на настава, причина неисчистените улици

БИТОЛА - Доцнење и пропуштени часови во дел од селските училиште во Битола предизвикаа снегот и неисчистените улици, потврдија од Секторот за образование во Општина Битола. Снежната покривка од дваесетина сантиметри го отежна сообраќајот во најголем дел од периферните и од приградските населби.

„Дел од учениците во прва смена задоцнија на часови поради отежнатиот сообраќај. За среќа, нема прекин на наставата, а ситуацијата полека се нормализира“, вели Снежана Петровска, раководител на Секторот за образование.

Во јавното претпријатие „Нискоградба“ во Битола велат дека се чистат улиците од прв приоритет, но оти не се заборавени ниту регионалните патишта. „Немаме информации дека се доцни на училиште поради неисчистени патишта. Ангажиравме осум градежни машини, а на најголем дел од улиците е ставено сол и ризла. Само за два дена се потрошени 50 тони сол и 20 кубни метри ризла“, објаснува Венцо Шишкин, раководител на зимската служба во „Нискоградба“. (А.Б.)