Илиевски му се извинува на МВР што го тепале в полиција!

Битола – „Му се извинувам на МВР што ме тепаа в полиција, му се извинувам што ја малтретираа мојата фамилија. Му се извинувам за тортурата и за притисоците врз моето семејство. § се извинувам на власта што ми го уништија сточниот фонд и од 86 грла добиток, ме донесоа на две грла. Јас се извинувам, ако тоа го посакува министерката за внатрешни работи, ама не знам кој на кого треба да му се извини“, рече фармерот Душко Илиевски откако МВР утврдило дека тој не бил малтретиран од полицијата и побара од него да се извини или, пак, клеветите да ги докаже на суд.

Илиевски и натаму цврсто стои на тврдењето дека ноќта пред да му биде одреден притвор полициски инспектор во СВР - Битола го удрил со стол. Од него било барано да потпише изјава дека намерно ја одгледувал марихуаната, како што ги осомничува полицијата него, брат му и татко му.

„Тврдам дека ноќта кога ме извадија од карцел и ме качија горе на катот кај инспекторите, еден ме испрашуваше, а другиот ме удри со стол. Со едната ногара од столот ме удри токму во слабината и затоа се пожалив кај народниот правобранител. Во затворот никој не ме праша дали ме тепала полицијата, туку дали земам дрога“, потврдува уште еднаш фармерот Илиевски.

Тој ги повикува министерката за внатрешни работи Јанкулоска и министерот за земјоделство Љупчо Димовски да се уверат дека цело битолско поле е обраснато со див коноп, а нивите на Илиевски се засадени со компири, а не со дрога.

„Годинава од моите ниви ќе извадам од 120 до 130 тони компир, како и 100 тони пиперки. Нека дојдат почитуваните министри, нека видат дека јас сум голем земјоделец-производител, а не дилер на дрога. Колку пати досега ме приведоа в полиција и ми поднесоа прекршочни пријави за сега да ме местат за одгледување марихуана. Добро е што народот ја виде вистината, зашто јас само си ги барам парите за предаденото и неисплатено млеко во ’Сведмилк‘“, рече фармерот Илиевски.

По излегување од притвор, машките глави од семејството Илиевски се вратија на нивите, во фармата, на битолскиот пазар. На главата се' уште им тежи каква одлука ќе донесе основниот јавен обвинител од Битола и дали против нив ќе поднесе обвинителен акт или, пак, ќе ги ослободи од гонење.

Обвинителството се' уште ги прибира дополнителните докази за овој случај. Обвинителот Петар Аневски најави дека за 30 дена се очекува да заврши истрагата. (А.Б.)