Почит без споменик на Карпалак

Единаесет години по крвавиот настан на местото се' уште нема споменик за загинатите 10 припадници на прилепскиот резервен состав на АРМ

Гојко Ефтоски



Тетово - Освен спомен-плоча поставена на банкината од автопатот Тетово – Скопје кај месноста Карпалак, ништо друго не потсетува на најкрвавото злосторство од 2001 година, кога на вчерашен ден тука беа убиени 10 припадници на прилепскиот резервен армиски состав. Единаесет години по настанот се' уште нема паметник за оние кои тука ги оставија своите животи. Вчера на местото на масакрот беа положени букети свежо цвеќе, а претставници на Тетовското архијерејско намесништво опслужија панихида. Кај спомен-плочата со цвеќе се поклонија роднини и пријатели на убиените, делегации на кабинетот на претседателот, на Министерството за одбрана и Генералштабот на АРМ, Владата, политички партии, здруженија и други.

„Единаесет години положуваме цвеќе на банкинава. Единаесет години бараме власта да постави барем едно камче како спомен на загинатите. Овде има само една спомен-плоча, која повеќе пати е сквернавена. Сметаме дека е крајно време да има подостојно обележје“, рече Ацо Јовановски-Реган, возачот на автобусот во кој се превезуваа настраданите.

„Владата не најде за потребно да постави споменик. Ниедна влада до сега не објасни што и како се случи овде на 8 август 2001 година. Денес никој не се интересира за состојбата на семејствата на загинатите на кои не им се решени основни проблеми од образование, здравство, социјала“, рече Јордан Трајковски од здружението „Резервни воени обврзници“ - Прилеп. Ацо Јовановски-Реган, возачот на тешко оштетениот автобус, кој по сила на случајноста ги извлече прилепските резервисти до Групчин, присетувајќи се на настанот вели: „На ова место бевме пречекани со ненадеен вкрстен оган од тешко оружување. Кањонов ечеше од пукотници и лелеци на повредените. Жртвите ги броевме кога се извлековме. Епилогот беше катастрофален – 10 убиени на саместо место. За овие изминати години, како последица на тешките повреди, трауми и шокови од случувањата, починаа уште шестмина. Карпалак заслужува поинаков почит и внимание. Не знам зошто не се изнајде начин за достоинствено оддолжување на загинатите. Не само ние што го преживеавме тој ужас, туку и многу други, им ја укажуваме нашата чест. Вистински живееме со ова место. Но, сето тоа не е доволно во однос на она што треба да го сторат надлежните“, вели Јовановски.