Во јуни турбо се летало над македонското небо

Македонското небо во јуни вриело од авиони. Таков заклучок барем може да се изведе ако се има предвид податокот дека македонскиот воздушен простор во јуни го прелетале 13.386 воздухоплови, што е апсолутен рекорд за овој период од годината.

Позитивниот тренд продолжил и во јули, па се очекува и во август да се одржи истиот интензитет на зголемување на бројот на прелетувања. Прогнозите се дека до крајот на годината, во нормални услови, ќе бидат забележани рекордни резултати во бројот на прелетувања на нашето небо.

Во јуни годинава Македонската контрола на летање М-НАВ регистирала зголемување на бројот на наплатни единици од прелетувањата за 6,2 отсто во однос на истиот период од минатата година, покажуваат податоците на Еуроконтрол. Зголемувањето е поголемо и од европскиот просек, кој за јуни изнесува 5,1 отсто.

„За само еден месец, во текот на јуни, се надминати негативните ефекти од огромната криза предизвикана од облакот со вулканска прав и комплетното приземјување на воздушниот сообраќај во период од една недела во април, потоа значителните редуцирања на летовите во Европа предизвикани од кризата, кои траеја се' до 20 мај, како и последиците од честите штрајкови на контролата на летање во соседна Грција“, посочуваат од М-НАВ и додаваат дека операциите со локалниот воздушен сообраќај на аеродромите во Скопје и во Охрид се со двоцифрени процентуални показатели за зголемување. (Ек.Р.)