Евровизија се сели во Шведска, за Македонија 12. место

Убедлива победа на претставничката на Шведска - Лорин, со темата „Еуфорија“ (372), Македонија во Баку го имаше најуспешниот пласман досега

Катерина Шекеровска

Атрактивната и специфична 28-годишна пејачка и продуцентка од Шведска, Лорин, со својата композиција „Еуфорија“ во Кристалната сала во Баку и' донесе убедлива победа на својата земја и организација на новото издание на изборот за Песна на Евровизија, кое в година најверојатно ќе се одржи во Стокхолм. Апсолутен фаворит во Баку, пред и за време на одржувањето на 57. издание на фестивалот беше Швеѓанката со мароканско потекло - прогнозите на обложувалниците се покажаа како точни. „Не сум девојка која често оди на журки, но мислам дека вечерва тоа правило ќе го прекршам“, изјави Лорин на пресот по победата, објаснувајќи како ќе го прослави триумфот. На прашањето како успеала да се фокусира и да победи, пејачката одговори: „Спиев многу, јадев многу и се обидов да не мислам многу за настапот. Да бидам искрена, јас сум срамежлива личност“, изјави Лорин, која имаше и мала незгода - проголта од снегот на сцената, а тоа подоцна и направи проблем со кашлање.

Победата на Лорин е петта за Шведска, која е една од најуспешните земји на Евровизија. Таа водеше уште од првите моменти на гласањето, додека понапнато беше во борбата за второ, односно трето место каде што се најдоа Русија и Србија. Среќата им беше понаклонета на симпатичните руски бабушки и нивната „Party for everybody“, додека Жељко Јоксимовиќ и „Љубав није ствар“ завршија на трето место, а Јоксимовиќ се збогува со Евровизија, барем како изведувач.

Македонската претставничка Калиопи со темата „Црно и бело“ се пласираше на 12. место, кое го подели со Романија со која имаа идентичен број на поени (71). Калиопи имаше моќен, доминантен настап на кој не може да му се забележи ништо. Напротив - ја претстави нашата земја најдостоинствено, а патем го разби и малерот што не' следеше во последните четири години, кога никако не успевавме да се пласираме во финалето на Евровизија. Оваа година на Евровизија 2012 во Баку се натпреваруваа 42 земји.

Најдобар пласман на Македонија

На „Евровизија 2012“ Македонија го повтори својот најдобар евровизиски пласман од 2006 година, завршувајќи на 12. место, но овојпат со повеќе поени (71). Елена Ристеска со „Нинанајна“ во 2006 година во Атина, Грција, се пласираше на 12. место, но со помал број на поени од Калиопи (вкупно 56). Последно учество на Македонија во финалето беше настапот на Каролина со „Мојот свет“ во Хелсинки, Финска, каде што освои 14. место.

Од трите ексју-земји, на финалето на Евровизија 2012 најдобро помина Србија освојувајќи 3. место, додека БИХ го оствари најлошиот свој пласман - 18. место.

Која е Лорин, победничката на „Евровизија 2012“?

Пејачката и музички продуцент Лорин (28) израснала во предградие на Стокхолм, во семејство по потекло од Мароко. Во 2004 година учествувала во шведското издание на „Идол“, а наредната година го издала синглот „The Snake“ со групата „Rob’n’Raz“, работела и како презентер на шведската ТВ 400, а била и продуцент на шоу-емисија. Вниманието на јавноста го привлече со учество на националниот избор „Melodifestivalen 2011“ со песната „My Heart is Refusing Me“. Интересно е што првобитно не се пласирала во финале, но нејзината песна станала хит, па затоа ја вратиле назад со нова песна. Со својот специфичен изглед и однесување го привлече интересот на јавноста и од почеток важи за фаворит.

Вели дека сака музика која фрла во транс, ја обожава Бјорк и Енија, а клавир научила да свири со музиката на Мајкл Ниман од филмот „Пијано“. За себе вели дека помалку е самотник, трагач кој бега од информациите со кои е преплавен денешниот свет, а признава и дека помалку звучи и хипи. Нема телевизор, а лаптопот го употребува само за музички програми и мејлови. „Еуфорија“ е нејзин трет сингл, а во септември планира да издаде албум.

ОГАЕ Македонија: Честитки за врвното претставување на Македонија

Клубот на евровизиски фанови ОГАЕ Македонија упати срдечни честитки до нашата евровизиска претставничка Калиопи Букле и нејзиниот тим, за нејзиниот перфектен уметнички настап, влезот во големото финале, врвното претставување на Македонија и освоениот пласман. „Посебно искажуваме задоволство од нејзината амбасадорска мисија и големи честитки за освоената престижна награда од Националната музичка академија на Азебејџан“, велат од ОГАЕ, чии членови беа дел од евровизискиот хепенинг во Баку.

Kaлиопи не падна на грчки провокации за името

На социјалните мрежи се појави видео во кое грчки новинар се обидува да ја испровоцира македонската претставничка околу спорот со името. Калиопи не падна на неговите провокации и со широка насмевка му одговори дека ја сака Грција, но дека е од Македонија. На прашањето на грчкиот новинар зошто по завршувањето на втората полуфинална вечер Калиопи кажала дека доаѓа од Македонија, а не од ФИРОМ, таа одговара: „Да. А, од каде си ти? Од Грција? Здраво, Грција! Ја сакам Грција! Јас знам дека името на вашата земја е Грција. Ја сакам Грција, грчката музика, танцуваме на грчката музика на македонските свадби. Ја сакам Грција! Те сакам миличок! Македонија ви е сосед. Ви благодарам, но Македонија е името на мојата земја“.

КОНЕЧЕН ПЛАСМАН

1. Шведска 372

2. Русија 259

3. Србија 214

4. Азербејџан 150

5. Албанија 146

6. Естонија 120

7. Турција 112

8. Германија 110

9. Италија 101

10. Шпанија 97

11. Молдавија 81

12. Македонија 71

13. Романија 71

14. Литванија 70

15. Кипар 65

16. Украина 65

17. Грција 64

18. Босна и Херцеговина 55

19. Ирска 46

20. Исланд 46

21. Малта 41

22. Франција 21

23. Данска 21

24. Унгарија 19

25. Велика Британија 12

26. Норвешка 7



КоJ гласаше за МакедониJа?

Албанија 8

Белорусија 2

БиХ 12

Бугарија 2

Хрватска 8

Италија 1

Србија 12

Словачка 1

Словенија 6

Турција 8

Украина 3

Вкупно: 71 поен



РЕЗУЛТАТИ ОД ВТОРАТА ПОЛУФИНАЛНА ВЕЧЕР

1. Шведска 181

2. Србија 159

3. Литванија 104

4. Естонија 100

5. Турција 80

6. БИХ 77

7. Mалта 70

8. Украина 64

9. Mакедонија 53

10. Норвешка 45