Владата се пере од скандалот за новинарите

Здружението на новинарите бара извинување од премиерот Груевски

Тамара Грнчароска

Владата, преку својот портпарол Мартин Мартиновски, „осуди каков било говор на омраза“ без директно да го спомене портпаролот на Секретаријатот за европски прашања, Златко Јанковски, кој во едно свое писмо оквалификува новинари како непријатели на државата. Притоа, портпаролот Мартиновски не можеше да одговори дали Јанковски ќе биде санкциониран поради нападот врз новинарите, префрлајќи ја топката на вицепремиерот Васко Наумовски. Мартиновски изјави дека портпаролот Јанковски не е директно под Генералниот секретаријат или под Владата, туку е под СЕП, па, според тоа, зависи од првиот човек на Секретаријатот за европски прашања, вицепремиерот Наумовски, дали неговиот портпарол ќе биде казнет или не.

Со остар протест до Владата поради писмото на портпаролот на СЕП, вчера се огласи и Здружението на новинарите на Македонија. „Здружението на новинарите смета дека таквото етикетирање и клеветење е надвор од сите пропишани норми во едно општество и длабоко засега во слободата на новинарската професија“, стои во реакцијата на ЗНМ, каде што се наведува дека ова не е првпат владини функционери јавно да прозиваат новинари поради начинот на нивното известување. „И затоа бараме од Владата да престане со ловот на
вештерки меѓу новинарите“, децидни се од ЗНМ.

„Истовремено сме загрижени што новинарското истражување зад кое стои угледна меѓународна медиумска компанија, како што е ВАЦ, и кое се однесува на човековите права и слободи, кои се алфа и омега во една демократија, е ставено на клада од страна на висок владин функционер“, е рекацијата на ЗНМ, притоа повикувајќи ја Владата да престане во мешањето во работата на новинарите и да врши притисоци, а да се фокусира на проблемите во државата, „а од премиерот Никола Груевски очекуваме извинување поради скандалозниот настап на портпаролот Јанковски“.

Портпаролот на Секретаријатот за европски прашања, Златко Јанковски, бил „испровоциран“ од текстот „Македонскиот недостиг од толеранција“ на новинарите Слободанка Јовановска од „Утрински весник“ и Светлана Јовановска и Бранко Ѓорѓевски од „Дневник“, објавен на порталот http://waz.euobserver.com, за законот за недскриминација во кој не беа вклучени хомосексуалците. Во овој текст се пренесени рекациите од невладиниот сектор во земјава дека Македонија со тоа се покажува како нетолерантно општество кон таквите групи, но и дека визната либерализација за Македонија била условена со носење таков закон и дека Европа нема да го заборави тоа. Јанковски во порака испратена по електорнски пат до други државни службеници и негови пријатели ги нарекува тројцата новинари „непријатели на Македонија“.

„Почитувани, ова мора да го видите. Типичен пример како работат непријателите на Македонија. Прочитајте го текстот, кој изобилува со левичарска идеологија и кој зборува против државата. Сами си се оцрнуваме пред цела Европа. Ова е страшно. Ова покажува на што се' се подготвени и што се' ќе направат за да се вратат на власт! Инаку, не е првпат истите автори да пишуваат вакви текстови, замислете. До каде и колку треба да се уништи сопствената држава за свои лични цели и за целите на политичарите од транзицијата! Срамота!“, е пораката на Јанковски.

На ставот на Јанковски реагираше и Кнут Прис, уредникот на порталот www.waz.euobserver каде што на англиски јазик е објавен новинарскиот текст. „Тврдењето дека текстот го фабрикувале ’непријателите на Македонија’ е смешно. Тоа само покажува дека толеранцијата, најверојатно, треба да биде подобрена не само кога станува збор за разните малцинства во земјата туку, исто така, кога се работи за квалитетно или критичко новинарство“.

Портпаролот на СЕП изјави дека тоа писмо било испратено од приватен и-мејл по истекот на работно време, во приватна комуникација. Јанковски, притоа, заборава дека тој е јавна личност и владин службеник, т.е. човек за односи со јавноста на еден од најважните сектори на Владата и дека поради тоа му се мери секој збор и потег, во работното време или надвор од него, особено ако е упатено до новинарите. Јанковски на функцијата портпарол на СЕП дојде од портпаролското место во Министерството за култура, а работеше и во Кабинетот на претседателот на државата Ѓорге Иванов.

Ваков напад врз новинари од страна на владини претставници не е прв случај. Дури и самиот премиер Никола Груевски во јуни 2008 година ги обвини дописничките на македонските медиуми од Брисел дека се грчки платеници и дека работат против државата. (Т.Г.)