Стопанската комора предлага награда за Владата ако го оствари ветеното

Системот на бруто-плати ќе се воведе до крајот на мандатот на Владата

МИРЧЕ ЈОВАНОВСКИ

Стопанската комора на Македонија вчера предложи Владата да се награди со 20 милиони денари (300 илјади евра) доколку таа го оствари она за што јавно се обврзала: раст на БДП од 6,5 отсто, инфлација 2,5-3 отсто, зголемување на вработеноста за 4 отсто, пораст на продуктивноста за 4-5 отсто и странски инвестиции од над 400 милиони долари. Таквите средства, како што предлага Комората, би се обезбедиле од Буџетот за 2008 каде што би се предвидела посебна ставка. Владата, засега, е без коментар за ваквата „великодушна“ понуда на стопанствениците. Премиерот Никола Груевски вчера молкум помина преку предлогот на стопанствениците на заедничката средба што тој и економскиот владин министерски тим ја имаше во Скопје со членството на Стопанската комора.

Не дознавме дали предлогот го смета за непристоен, бидејќи практично Владата ќе треба да се награди самата себеси за нешто што и' е работа, или, пак, во духот на новиот пристап дека „молчењето значи прифаќање“, што ќе се практикува во новите законски прописи всушност, значи одобрување на предлогот.

Според Комората, со оглед на тоа што реализацијата на макроекономските предвидувања ќе се остварува во поусложнети услови на стопанисување, што во најголем дел е резултат на поскапите енергенси и зголемената конкуренција, „неопходни се дополнителни залагања на Владата“. Таквите „дополнителни залагања“, доколку дадат плод, според Комората, треба дополнително да се наградат. Од Комората не прецизираа што доколку се остварат полоши резултати од очекуваните.

Наградата што ја предлага Стопанската комора е само една од мерките кои таа вчера и' ги испорача на Владата со крајна цел да се подобри вкупниот економски амбиент во земјава. Завчера, на слична средба со премиерот Груевски и министрите од економските ресори, и стопанствениците од Сојузот на стопански комори ги искажаа своите очекувања. Така, во само два дена Груевски практично ги ислуша очекувањата на речиси целокупната бизнис-заедница од земјава.

„Не претендираме да кажеме дека сме најпаметните“, истакна во воведниот говор пред бизнисмените и членовите на Владата, претседателот на Стопанската комора на Македонија, Бранко Азески. Образложувајќи ги дваесетте мерки што ги подготви Стопанската комора врз основа на спроведена анкета меѓу нејзините членки, Азески нагласи дека од Владата тие очекуваат да се заложи да се спроведе системот на бруто-плати, да се намалат придонесите кои го оптоваруваат водењето на бизнисите и ја стимулираат сивата економија и дека очекуваат ист третман како кон странските, така и кон домашните инвеститори, барање, кое завчера беше едно од основните на средбата меѓу ССК и Владата. Од Комората, исто така, очекуваат Владата конечно да го реши спорот околу гасоводниот систем во земјава, но и да спроведе значајни мерки во борбата против сивата економија и да се заложи предвидените капитални расходи во Буџетот целосно да се реализираат. Исто така, стопанствениците побараа ефикасна и стручна јавна администрација и контрола врз финансирањето на политичките партии, односно измена на Законот за финансирање на политичките партии.

Системот на бруто-плати, дефинитивно, ќе биде воведен до крајот на мандатот на оваа Влада. Тоа го најави и лично премиерот Груевски, објаснувајќи дека тоа е дел и од четиригодишната програма на Владата. Сепак, кон оваа промена нема да се оди наеднаш, туку фазно со цел да се избегнат евентуалните шокови. Во поширокото излагање што го имаше Груевски пред бизнисмените, речиси идентично со она од завчера пред членките на Сојузот на стопански комори, премиерот се задржа на досегашните ефекти од работењето на Владата, како и она што може да се очекува во наредниот период. Тој дел од одговорноста за недонесување на законите префрли на адреса на парламентот, каде што од 230 закони кои го минале владиниот филтер, на донесување чекаат половината, односно 115.

Што се однесува до конкретните барања на стопанствениците, реформи можат да се очекуваат и кај придонесот за здравствено осигурување. Според министерот за финансии, Трајко Славески, во моментот надвор од системот на здравствено осигурување се наоѓаат над 200 илјади лица, од кои 40-50 илјади вработени. Сето тоа зборува во прилог на фактот дека во овој дел се неопходни реформи, појасни Славески.

„Во делот на борбата против сивата економија е забележан значаен напредок“, рече Груевски, според кого зголемувањето на приходите за 20 отсто при намалени даноци е доказ за таквите ефекти.Тој, исто така, додаде дека ќе се разгледаат внимателно сите предлози на стопанствениците, како од Стопанската комора на Македонија, така и од Сојузот на стопански комори на Македонија, не пропуштајќи да каже дека ССК бара дел од имотот на Комората, како и учество во поделбата на одделни лиценци и дозволи.