Велосипедска парада по повод Денот на кралицата на Холандија
Прославата започна со одбележување на изградбата на велосипедската патека
Весна Дукоска
Сенада Иса
Со велосипедска парада од населбата Аеродром до плоштадот „Македонија“, со која се означи почетокот на изградбата на велосипедската патека долга 1,5 километри, вчера, амбасадата на Холандија во Македонија организира прослава по повод Денот на кралицата - Националниот ден на Кралството Холандија. Во фокусот на хепенингот што се одржа под мото „Освежи се - Refresh Yourself“ беше велосипедот, како симбол на здрав, еколошки и модерен начин на превоз, но и како симбол на некои од вредностите на холандското општество.
„Оваа манифестација има за цел да го промовира возењето велосипеди, водењето здрав живот и да се избегне проблемот со паркирање на улиците. Во Холандија има околу 15.000 километри велосипедски патеки, а тоа сакаме да го сториме и во Македонија“, рече амбасадорката на Холандија во Македонија, Симон Филипини.
На прославата присуствуваше и министерката за внатрешни работи, Гордана Јанкуловска, која учествуваше и во парадата со велосипеди и заедно со градоначалникот Трифун Костовски пристигна меѓу првите на плоштадот „Македонија“. „Се надевам дека во иднина граѓаните се' почесто ќе користат велосипеди, а се' помалку автомобили“, рече Јанкуловска. Насобраната публика ја забавуваа „Бајк - виртуози“, изведувајќи разни егзибиции со своите велосипеди. Неколку скопски основни училишта ги претставија своите велосипеди украсени во најразлични мотиви и упатија пораки за зачувување и заштита на животната средина.
„Побарајте од вашиот градоначалник да ви изгради многу велосипедски патеки по кои ќе можете да возите до училиште, до работа или на прошетка“, и' се обрати на публиката амбасадорката Филипини, прогласувајќи го основното училиште „Конгреси и манастири“ за победник и свечено му додели велосипед.
Во рамките на прославата на Националниот ден, во Музејот на Град Скопје, амбасадата на Холандија организира изложба на уметнички проекти инспирирани од велосипедот, а изработени од познати македонски уметници и осум основни училишта од Скопје. Со овие настани се означува и почетокот на долгорочна кампања, во соработка со Министерството за животна средина и просторно планирање, Агенцијата за млади и спорт и Македонската велосипедска федерација, за освежување на велосипедската традиција во Македонија. |
