Вељаноски не повикал полицајци во маички

„Нема барање ниту од претседателот на Собранието ниту од Јанкулоска за зголемување на безбедносните сили“, рече Цветко Грозданов

Оливера Војновска


Претседателот на Собранието, Трајко Вељаноски, не ги повикал вооружените полициски службеници во маички на 1 јули кога се случи инцидентот меѓу собраниското обезбедување и пратениците од опозицијата. Признанието стаса на вчерашната седница за интерпелацијата на министерката за внатрешни работи, Гордана Јанкулоска, и тоа директно од владејачката партија од чии редови доаѓа Вељаноски (иако, формално, поради функцијата, партиското членство му е замрзнато).

Пратеникот од ВМРО-ДПМНЕ, Цветко Грозданов, внесен во фотографиите од инцидентот со кои ја излепи собраниската говорница, рече: „Ќе ви кажам дека нема барање ниту од претседателот на Собранието ниту од министерката Јанкулоска за зголемување на безбедносните сили во Собранието“. Грозданов додаде дека немало ниту потреба од такво барање, бидејќи тој ден во парламентот на работна задача било вообичаеното собраниско обезбедување. Некои биле во униформа, некои во цивилка, додека оние лица што однадвор ја обезбедувале, зградата имале натписи „полиција“. Тој во дискусијата уште направи и една невкусна асоцијација со водачот на милитантно исламистичко движење Осама Бин Ладен. Критикувајќи ги социјалдемократите дека тие немале право да го влечат и да го туркаат полицаецот во маичка што ги снимал нивните разговори со стечајците, Грозданов рече: „ Ако го видите Бин Ладен на улица, ќе го истепате?Не, туку треба да го пријавите во полиција!“.

Додека тој говореше, спикерот Вељаноски само кисело се насмевнуваше. Веројатно, не очекуваше да ја истурат водата врз неговото лице оние што му аплаудираа во Собранието откако ја преживеа „големата бура во чаша вода“, како што самиот иронично го нарече барањето за негово разрешување.

По настапот на Грозданов, потпретседателот на Собранието, Јани Макрадули, констатира дека спикерот сега слободно може да ја прекине седницата.

„Кажавте дека нема барање од Вељаноски да се шетаат вооружени лица во маички низ Собранието. Јасно ја лоциравте одговорноста дека е прекршен член 43 од Законот за Собрание и Вељаноски од морални причини треба да си поднесе оставка“, рече Макрадули. Притоа побара од Грозданов да се извини затоа што „полицајците ги споредил со Бин Ладен“.

Во почетокот на седницата, образложувајќи ги мотивите за интерпелацијата за Јанкулоска, Макрадули ја опиша министерката за внатрешни работи како личност што „тужи, суди, егзекутира и ужива во снимките од приведувањата“.

„Вие сте истражен судија, обвинител и џелат“, заклучи Макрадули. Според него, таа ќе биде запаметена како министер во чие време се „инсталира полициска држава“. Критикувајќи ја министерката, тој рече дека таа е опкружена со „љубители на скапи часовници и ергели“ и дека „поранешни келнери во Собранието преку ноќ станале полицајци“. Макрадули ја повика Јанкулоска да каже кој дал наредба за полицискиот упад во Собранието. „Упадот на полиција во парламентот во нормална демократија значи оставка на Владата“, заклучи тој.

Јанкулоска не можеше да дочека Вељаноски да и' даде збор, па уште додека тој читаше дека „според Уставот и Деловникот министерката има право на одговор“, таа застана на говорницата и со нетрпение чекаше спикерот да ја заврши реченицата. Нејзиниот настап беше обоен со цинизам. Таа презентираше „факти и фотографии за да се тргне и последната нејаснотија за тоа кои беа насилниците, а кој одмерено и професионално си ја вршел работата“. Нагласи дека неа ја нема на тие снимки. Таа забележа дека јавноста ќе може да види „дали законите важат за сите други, освен за некои пратеници што може секогаш да поминуваат неказнети“. Искажаните квалификациите на нејзина сметка ги нарече „несреќно и срамно промовирање омраза и симнување на нивото на демократијата во законодавниот дом“.

„Почитта е нешто што се заслужува и не може да се генерализира. Многумина од вас покажаа дека можат да бидат пример за демократијата во Македонија. Неколкумина промовираа насилничко и примитивно однесување, примена на брутална сила, кој за нив е супериорна во однос на зборот. Нивните визии за промоција на насилството како начин на дијалог претставуваат срам за нив лично и за Собранието. Пратеничкиот имунитет не е дозвола за вандалско однесување“, оцени министерката.

Пратеничката од СДСМ, Весна Бендевска, го нарече Вељаноски „мало безначајно партиско војниче“ седнато на претседавачкото место во парламентот.

Според неа, спикерот е исплашена личност и без никаква партиска моќ“ и затоа „го претворил Собранието во село без кучиња“. Но, затоа Јанкулоска има далеку поголема партиска улога и влијание. Бендевска ја праша министерката: „Кој ве истегна за ушите да ги симнете од сајтот на МВР фашистичките писма?“

Координаторката на пратеничката група на ВМРО-ДПМНЕ,Силвана Бонева, реагираше за навредливите квалификации и за говорот на омраза што го препозна во настапот на Бендевска. Таа изрази згрозеност од јазикот што се користи од говорницата и ги повика пратениците од СДСМ да се однесуваат со должна почит и кон Вељаноски и кон Собранието. Шефицата на пратеничката група на СДСМ, Цветанка Иванова, рече дека „Вељаноски ќе биде почитуван кога ќе има еднаков третман кон сите пратеници“.

Во собраниската сала (во првиот дел од седницата до паузата) беше забележливо отсуството на пратениците од ЛДП и од Нова демократија. (О.В.)