Македонија ја призна новата власт во Либија

Слободанка Јовановска

Mакедонија е една од четириесетината земји во светот што го признаа Преодниот национален совет на Либија како легитимна власт. Одлуката е донесена без публицитет и веќе може да се прочита на официјалната страница на Министерството за надворешни работи.

„Македонија се приклучува кон напорите и активностите на меѓународната заедница за имплементирање на целите на резолуциите 1970 и 1973 на Советот на безбедност на ОН. Македонија, на линија на позицијата на Европската унија, ги имплементира сите рестриктивни мерки кон Либија усвоени од страна на Советот на ЕУ. Македонија го признава Преодниот национален совет на Либија, како легитимен претставник на Либискиот народ и на Либија“, стои на страницата на МНР.

Неофицијално, Владата деновиве ќе потпише и признавање на новоформираната држава Јужен Судан, акт што не е врзан со признавањето на нашето уставно име, бидејќи тој чекор го следи воспоставувањето дипломатски односи. Ваквите брзи реакции се должат на инволвираноста на меѓународниот фактор во случувањата во двете земји и на потребата зад потезите на САД и на ЕУ да застанат и други земји што ја следат нивната политика.

Како Македонија ја води „големата“ политика и како реагира на кризите во светските кризни жаришта покажа вчера штотуку објавениот допис од амбасадата на САД во Скопје на „Викиликс“. Во него стои дека пред гласањето во ОН за антиизраелска резолуција, одговорот што го добиле претставници на амбасадата од МНР бил дека Македонија ќе ја земе предвид позицијата на САД, но, најверојатно, ќе ја следи заедничката политика на ЕУ околу ова прашање, а бидејќи последниот пат земјите-членки на ЕУ или биле отсутни од гласањето или апстинирале, па така ќе се однесуваме и ние.

„Македонија, генерално, ја поддржува позицијата на владата на САД во Генералното собрание на ОН. Како земја-кандидатка за ЕУ, Македонија вообичаено се чувствува обврзана да ја следи ЕУ-позицијата ако постои таква, дури и кога САД имаат спротивен став. Ако нема ЕУ-консензус, Македонија вообичаено апстинира или не' поддржува нас“, стои во дописот објавен на „Викиликс“.

Инаку, Франција е првата земја што ја призна новата власт во Либија, далеку пред да се знае исходот од безредијата. По неа, тоа го сторија Лондон и Рим, а малку подоцна и САД, Германија и Јапонија. Поголем дел од африканските земји не ја признаваат новата власт, бидејќи тие беа против странска интервенција и се залагаа за политичко решение на проблемот во Либија.