Пожари во централна Русија однесоа осум животи

Раширени од силните ветрови, огнените јазици голтаа шуми и полиња

ВОРОНЕЖ - Шумски пожари се разгореа вчера низ централна Русија, при што загинаа најмалку осум лица и беа причина за евакуација на илјадници за време на најтоплото лето откако пред 130 години почна да се мери температурата. Раширени од силните ветрови, огнените јазици голтаа шуми и полиња, кои веќе беа спалени од топлотниот бран. Министерството за вонредни ситуации соопшти дека горат 866 квадратни километри, област со големина на Берлин. „Не знаеме каде да одиме“, вели Галина Шибанова (52), која стоеше пред изгорените остатоци од семејниот дом во градот Масловка во регионот Воронеж, на околу 500 км јужно од Москва. „Им се јавивме на службите за вонредни ситуации и никој не ни одговори на телефонските повици“, рече таа, додавајќи дека најмалку 50 домови се уништени.

Топлотниот бран ги опфати европските делови од Русија и Сибир уште од јуни, уништувајќи посеви и доведувајќи илјадници земјоделци на работ од банкрот. Како индикација за сериозноста на ситуацијата премиерот Владимир Путин ги откажа средбите во Москва и замина за Нижни Новогород, каде што најмалку 540 домови беа уништени, за да присуствува на вонредниот состанок со локалните официјални лица.

Повеќе од 1.100 куќи се уништени низ централна Русија, изјави Сергеј Шојгу, министер за вонредни ситуации, кој беше цитиран од руските новински агенции. Тој додаде дека 238.000 лица се ангажирани за да се справат со пожарите. (Ројтерс)