Опозициски ултиматум за Вељаноски

СДСМ, НСДП и ПЕИ ќе се вратат на координациите ако спикерот го дополни дневниот ред со нивните предлози

Светлана Унковска



Опозиционерите вчера не отидоа на координација кај претседателот на Собранието, Трајко Вељаноски, лути поради тоа што тој не ги става на дневен ред нивните предлог-закони. На средбата кај шефот на парламентот, наменета за договор за денешната седница за пратенички прашања, присуствуваа двајцата координатори од владејачкото мнозинство Силвана Бонева од ВМРО-ДПМНЕ и Талат Џафери од ДУИ, а единствен опозиционер беше Имер Алиу од ДПА.

Координаторите на пратенички групи од опозицијата останаа на ставот дека ќе ги бојкотираат овие средби бидејќи кај Вељаноски препознале тенденција да ги маргинализира нивните активности, со тоа што предлозите кои доаѓаат од опозицијата не ги става на расправа на собраниска седница. На координацијата не се појави ниту потпретседателот на Собранието од опозициските редови, Јани Макрадули.

СДСМ и вчера реагираше оценувајќи дека Вељаноски грубо ги злоупотребува службените овластувања и постапува спротивно на парламентарната практика, според која предлозите се ставаат на дневен ред по редоследот со кој се доставени.

„Трајко Вељаноски, по диктат на ВМРО-ДПМНЕ, го злоупотреби чувствителниот момент во кој вниманието на јавноста е насочено кон петкратното убиство за да направи груб упад во парламентарната практика надевајќи се дека тоа ќе помине незабележано. Дополнително, во стандардниот стил на ВМРО-ДПМНЕ, за сопствената манипулација се обиде да не' обвини нас“, рече Весна Бендевска од СДСМ.

Се работи за вкупно осум предлози на опозицијата кои останаа во фиоката на Вељаноски. Меѓу нив е предлогот за уставни измени со кој би се спречило застарување на евентуални кривични дела поврзани со приватизацијата, потоа предлог-дополнување на Законот за слободен пристап до информации од јавен карактер со кој се предлага сите владини институции да имаат обврска да го објавуваат износот и структурата на јавниот долг, а опозицијата достави и предлог за воведување нова државна награда „Киро Глигоров“, како и иницијатива за дополнување на законот за социјална заштита со кој социјалните случаи би добивале дополнителни две илјади денари за купување на прехранбени производи од македонско потекло...

Бендевска вели дека единствената причина поради која нивните законски решенија не се наоѓаат на дневен ред на Собранието е намерата ВМРО-ДПМНЕ да ги блокира, поради што поставија услов за нивно враќање на координациите: „Господине Вељаноски, испочитувајте ја парламентарната практика, дополнето го дневниот ред на претстојната седница закажана на 25-ти со нашите предлози и овозможете ни да дебатираме за решенија што ќе го подобрат животот на сите граѓани. Направете го ова и веднаш ќе се вратиме на координација“, порача Бендевска.

Од Кабинетот на Вељаноски вчера не одговорија како ќе постапат по условот што го постави СДСМ и одбија да дадат каков било коментар. Откако завчера парламентарната опозиција објави бојкот на координациите, Вељаноски објасни дека законите што ги предлага опозицијата ќе ги стави на првата наредна седница што ќе ја закаже и дека за тоа ги известил опозиционерите. Но, координаторот на НСДП Горан Мисовски укажува дека токму под оваа изјава се крие манипулацијата и измамата.

„Вељановски вели дека ќе ги стави на дневен ред на наредна седница, но не кажува на која наредна седница. Тој не кажува дека наредната седница е во јуни. Сега под итно сака да го протне новиот закон за лустрација што го стави на дневен ред во средата, а овие закони што ни ги одби, ги предложивме уште пред неколку недели“, вели Мисовски.