Кој ќе излезе на мегдан со Коце?

Скопскиот градоначалник влезе во кампања за втор мандат, а опозициската левица се' уште калкулира кој би бил најсоодветен противкандидат

Александра М. Митевска


Скопскиот градоначалник Коце Трајановски, кој ги троши последните десетина месеци од мандатот, влезе во кампања за следните локални избори, што ќе се одржат напролет идната година. Иако едно време се шпекулираше дека во ВМРО-ДПМНЕ се размислува на следните избори за главниот град да биде кандидиран актуелниот градоначалник на Аеродром, Ивица Коневски, сега, таа варијанта како да испаѓа од игра. Градот Скопје распиша оглас за изработка на кампања во која би се промовирале достигнувањата на локалната самоуправа во изминатите три години, односно во периодот додека Трајановски е градоначалник и додека коалицијата на ВМРО-ДПМНЕ го има мнозинството во Градскиот совет.

Трајановски, се чини, може да биде комотен дека ќе добие шанса да се бори за втор мандат, меѓу другото, и поради тоа што неговото евентуално елиминирање од трката би можело да биде сфатено како признавање дека владејачката партија не е задоволна од тоа како се воделе политиките и се спроведувале проектите во Скопје. Во главниот град, од друга страна, во изминатите три години со ударничко темпо се подигаат споменици, музеи, театри, се градат булевари и мостови. А, во најава е уште позасилена градежна офанзива која се очекува допрва да добива на интензитет и да финишира токму пред изборите идната пролет.

Олеснителна околност за Трајановски е и тоа што тој е „тврдо“ партиско решение (претходно беше пратеник, градоначалник на Гази Баба и член на Извршниот комитет на ВМРО-ДПМНЕ), така што, е прв кандидат и прв скопски градоначалник кој доаѓа директно од редовите на ВМРО-ДПМНЕ, која, пак, претходно во битката за Скопје се одлучуваше да поддржи независни кандидати, како Љупчо Николовски - Фуфо, или Трифун Костовски.

Колку ќе му биде удобно на актуелниот градоначалник за време на кампањата и на изборите, многу зависи и од тоа кој ќе биде негов директен ривал од редовите на опозициската левица. Од СДСМ најавија дека порано ќе ги обелоденат имињата на своите адути за локалните избори, но досега не испливало на површина ниту едно посигурно име.

Социјалдемократите и нивниот лидер Бранко Црвенковски им дадоа на локалните избори значење на референдум - за заминување или останување на гарнитурата која, на централно ниво, е на власт од 2006 година. Поради тоа, првичните најави од опозицискиот штаб се дека овој пат и социјалдемократите, веројатно, ќе го бараат кандидатот за градоначалник на Скопје во редовите на потесното партиско раководство. Опозициски функционер коментира дека функцијата градоначалник на Скопје, практично е четврторангирана во политичката хиерархија на државата и дека нејзиното освојување е голем предизвик. Поради тоа, како што вели, СДСМ овој пат треба да преземе одговорност и за оваа позиција да номинира „изворно партиско решение“, особено поради значењето што им се дава на локалните избори како сигнал за расположението за претседателските и за парламентарните избори.

Во изминатите години и СДСМ за Скопје номинираше кандидати надвор од партијата, како што беа неврохирургот Јовица Угриновски во 1996, Ристо Пенов од ЛДП во 2000 и во 2005 и Тито Петковски од НСДП во 2009 година. Овој пат, од најтесното партиско јадро, како можни кандидати се споменуваат секретарот на СДСМ и пратеник, Андреј Петров, потпретседателот и пратеник, Гордан Георгиев и градоначалникот на Карпош и претседател на скопската организација на партијата, Стевчо Јакимовски. Но, за Јакимовски велат дека преферира да се натпреварува за уште еден мандат во Карпош, а Георгиев се споменува и како можен кандидат за градоначалник на Центар, додека Петров веќе има искуство во локалната власт, како советник и градоначалник на Карпош. За ваквите навестувања засега нема официјална потврда и тие се' уште се во зоната на шпекулациите.

Изборите во Скопје се мошне специфични. Има запишано 450 илјади гласачи, што е повеќе од една четвртина од гласачкото тело во државата. На резултатот од изборите во главниот град влијаат повеќе фактори: Во десетте општини во рамките на Скопје се спроведува посебно гласање за градоначалници и за советници, така што сите понудени кандидати на партиите, исто така, влијаат на вкупното расположение. Градоначалниците, пак, се избираат во два круга, така што се отвора простор за меѓупартиски договарања и пазарења меѓу двете етапи гласање. Онаа партија што ќе го добие главниот град би можела да се смета за релативен победник на изборите, чиј вкупен исход зависи и од бројот на освоени градоначалнички места во другите општини, како и од збирниот резултат што ќе го освои една партија или коалиција на советничките листи.