Репортажа за Крушево емитувана на Би-Би-Си

Репортажата беше направена за време на манифестацијата „Етно Крушево“

Лондон - Репортажата за Република Македонија и за Крушево, направена од репортерската екипа на Би-Би-Си од Лондон, во време на одржувањето на манифестацијата „Етно Крушево“, досега е емитувана неколкупати во различни термини на информативната програма Би-Би-Си ворлд, која сателитски се емитува во целиот свет.

Во филмскиот прилог што трае околу шест минути не се прикажани само убавините на овој македонски град, туку е направена и промоција на еден проект, кој репортерката го нарекува прв на Балканот, каде што еден историски настан од пред сто години не е искористен за кавга, туку за презентирање на крушевските туристички можности и за развој на градот.

Репортерката, еднаш фатена во оро со крушевчани, а друг пат облечена во локална народна носија, потсетува на настанот од историјата на Македонија, од времето кога, како што вели, е создадена првата република на Балканот, а потоа зборува како некогашните непријатели сега заедно се шетаат во облеките и униформите од 1903 година. Во оваа голема претстава нема публика, затоа што сите луѓе од еден град се дел и учесници во претставата.

Според Би-Би-Си, идејата за ваков проект е значајна, затоа што доколку таа продолжи да се развива, треба да се очекува обнова и заживување на градот. Повикувајќи се на изјавите на неколкуте соговорници, репортерот на Би-Би-Си ги навестува очекувањата за заживување и развој на некои занаети и мали производствени капацитети што веќе се исчезнати, како и можност за задржување на младата популација да остане во Крушево и во Македонија.

За земја со висок степен на невработеност, еден ваков проект, каков што е „Етно Крушево“, отвора многу перспективи.

Престојот и репортажата на екипата на Би-Би-Си се направени во соработка со Агенцијата за странски инвестиции во Република Македонија. (То.И.)

Видео