Корупцијата се спречува со неселективност
Корупцијата ги напаѓа сите општества и економии, а може да се спречи со неселективност, професионализам и со меѓународна соработка. За успешна борба не е потребна само правна рамка, туку политички, културен и вредносен систем во кој корупцијата ќе се препознава како општествено зло. Ова, меѓу другото, беше потенцирано на вчерашната меѓународна работилница на тема „Судир на интереси и имотна состојба“ што ја организира Државната комисија за спречување корупција и инструментот TAIEX на Европската комисија.
„Ако сакаме да зборуваме за правна држава, демократија, тогаш е потребно доследно спроведување на законите, на сите нивоа и неселективно. Кога зборуваме за градење институции, треба да се обезбеди нивна финансиска независност. Кога зборуваме за превенцијата, неопходен е систем во кој корупцијата ќе се гледа како општествено зло кое треба да се превенира и санкционира. Во таа насока голема одговорност имаат функционерите, кои во своите одлуки треба да поаѓаат од јавниот интерес, заснован врз правните прописи и да се издигнат над своите лични и партиски интереси“, нагласи претседателот на Собранието, Трајко Вељаноски.
На меѓународната конференција учествуваат експерти и претставници на надлежни институции од Македонија, Франција, Романија, Летонија, Словенија, Хрватска, Турција, Албанија, Бугарија, Србија, Босна и Херцеговина, Црна Гора и од Косово кои ќе дискутираат за најдобрите начини во справување со судирот на интереси и борбата против корупцијата.
За Патрик Пакет, претставник од Европската комисија во Македонија, значајна улога во борбата против корупцијата има спроведувањето на законите, но како дел од превентивните мерки треба да се зголеми професионализмот на јавната администрација, но и на избраните и именуваните функционери.
„Во спречувањето на судирот на интереси и во борбата против корупцијата, треба да се пристапи внимателно, со обезбедување на сите неопходни факти до кои понекогаш е тешко да се дојде“, смета претседателката на ДКСК, Мирјана Димовска. (К.Ч.) |
