Поглед

Кавга за Кокино

Катерина Богоева

Зошто се девалвираме самите себеси?

Ова прашање граѓаните си го поставуваат многу често во транзицијава, барајќи одговори зошто не успеваме да ги задржиме на респектирачко ниво вредностите што ги поседуваме (културните и природните) и зошто не можеме како такви, во секоја можна прилика, без проблем да му ги покажеме на светот.

Последниот случај поврзан со откривањето на т.н. Кокино култура од астрономот Ѓоре Ценев, сознание презентирано на прес- конференција без археолошки наоди, како и острите негирања од Македонското археолошко друштво и од поединци-археолози, дека станува збор за „аналфабетско интервенирање во археолошката наука“, покажа оти мошне длабоко се забраздени несогласувањата меѓу астрономот и дел од археолозите околу Кокино, за што и досега само се шушкаше.

Сознанието за постоење нова културна група (на што обично се трошат не само десетици, туку и стотина истражувачки години), претходно изнегирано дома, Ценев ќе го презентира на стручен собир во Венеција каде што ќе оди и покрај реакциите на археолозите.

Истовремено, тоа ќе биде и презентација на Македонија, а Кокино, кој е дел од нашето културно и природно наследство, важи за потврдена мегалитска опсерваторија и светилиште, локалитет каде што се' уште работат археолозите и кој уште долго ќе треба да се истражува. Колку лесен пристап, секој си стои на своето без претходно да се усогласат сознанијата барем кога се оди пред светот. Без да се размисли дека може лесно да се прокоцкаат тешко стекнатите научни резултати, и астрономските и археолошките. Истражувањата во Македонија се прават во најголем дел со мали државни пари, па потребно ли е да се потсетува дека одговорноста на истражувачите треба да биде многу поголема.