Владата денеска ги брани реформите во Брисел

Состанокот за Македонија ќе се одржи по оној за Исланд и одлуката оваа земја да почне веднаш преговори со ЕУ

Министерот Антонио Милошоски и вицепремиерите Абдулаќим Адеми и Васко Наумовски денеска попладне во Брисел ќе ги бранат реформите во Македонија, но, пред се', ќе треба да објаснат што се случува во спорот околу името на државата и какви се шансите да се одблокира евроинтеграцијата на земјата. Иако од Владата најавуваат дека очекуваат позитивни оцени за постигнувањата, пораката што се навестува од ЕУ е дека со чекорите назад во реформите и во политичкото функционирање тешко ќе се избегне негативниот извештај на Европската комисија наесен што, пак, може да ја загрози препораката за преговори со ЕУ. Иако препораката и сега не е употреблива, сепак, тоа ќе биде сериозна шлаканица за имиџот на Македонија во Брисел, каде што оценуваат оти спорот за името се користи како параван за неисполнувањето на реформите, а нашата власт обратно. Според заклучоците за состанокот, кои се веќе подготвени во Брисел, Владата ќе биде предупредена дека мора да продолжи со реформите, дека треба да престане со партизацијата на администрацијата, да го ослободи судството од политичкото влијание, да им обезбеди слобода на медиумите, да создаде регулатива за слободни избори натаму, мудро да ги троши парите од буџетот и да го обнови политичкиот дијалог, кој е во криза.

Состанокот ќе почне денеска во три часот, а на него од страна на ЕУ ќе учествуваат еврокомесарот за проширување, Штефан Филе, и претседавачот, белгискиот министер за надворешни работи, Стивен Ванакере. Советот за стабилизација и асоцијација е највисока институционална структура за билатерален политички дијалог и соработка меѓу Македонија и ЕУ, воспоставена со Спогодбата за стабилизација и асоцијација, која стапи во сила на 1 април 2004 година. Состаноците на Советот за СА се одржуваат еднаш годишно,а нашиот ќе му претходни неколку часа на дијалогот на ЕУ со Исланд, со што практично оваа земја ќе ги почне формално преговорите за членство во Унијата. Тоа е најбрз пат до преговори од која било земја-кандидатка за ЕУ во последната деценија. „Исландскиот воз“ беше аргументот со кој се убедуваше Македонија да го реши спорот за името, со неформални навестувања дека ќе беше можно и нашата земја на овој состанок да добие преговори за членство. (С.Ј.)