Владата ќе се изјаснува за пакетот мерки од ССМ

Сојузот на синдикатите на Македонија соопшти дека пред почетокот на летните одмори Владата ќе се произнесе за пакетот антикризни мерки предложени од Синдикатот. „Очекуваме кон крајот на јули, по формирањето на економско-социјалниот совет, Владата на првата седница да се произнесе за мерките што ги понудивме, со цел економската криза да не стане социјална“, рече Живко Митревски, в.д. претседател на ССМ.

Од Синдикатот изјавуваат дека пакетот мерки требаше порано да се предложи, но не сметаат дека е задоцнет, како што рече министерот за финансии Зоран Ставрески. „Премиерот Никола Груевски изјави дека голем дел од мерките ќе бидат анализирани. Новото раководство веднаш реагираше со мерките за подобрување на работничките права, се надеваме дека во најбрз можен рок Владата ќе се произнесе за нашите барања“, изјави Митревски.

На почетокот на јули ССМ предложи пакет мерки за скратување на работното време, субвенционирање од страна на државата во случај на принудни одмори, исплата на работниците од државниот буџет.

Предложи и дополнителни мерки за подобрување на инвестиционата клима во државата, поддршка преку субвенционирање за зачувување на работните места во секторите на економијата, посебно во производството на метали, текстилната индустрија, градежништвото, земјоделството и други гранки, создавање услови за утврдување минимална плата.

Во петокот ССМ изјави дека Синдикатот, со решение од Министерството за труд и социјална политика, освен во приватниот, станува репрезентативен и во јавниот сектор на национално ниво.

Во гранковите синдикати репрезентативни се во 85,80 отсто и тоа во градежниот сектор, здравството, агро синдикатот, во рамките на текстилната индустрија, енергетиката и комуналните дејности и угостителството. (Ек.Р.)