На шалтер во банка и по еден час

Најнеуслужни се банкарите на шалтер, вака се изјасниле граѓаните и во годинашното истражување на „Свот“

Соња Маџовска


Метеж, редици, нервоза, губење време и по речиси еден час. Ваква е најчесто сликата пред банкарските шалтери. Од десет шалтери, па дури и во големите банки, работат неколку, па и само два-три. И покрај тоа што некои банки воведоа автомат на кој се подига ливче, со бројче за ред, повторно се чека многу. Предност им се дава на фирмите кои во банките го регулираат платниот промет, а за граѓаните што чекаат за да подигнат пари или да платат сметки изгледа банкарите сметаат дека имаат повеќе време за губење. Во некои банки, сепак, добро е тоа што шалтерите за платен промет се одделени од оние за население.

Посебна е сликата кога се даваат пензии. Е тогаш, тој што ќе влезе во банка, за да плаќа сметки, кредит, рата за картичка или која било друга обврска ќе се изначека.

Тука се и непријатните телефонски опомени, со кои банките во последно време не ве оставаат намира. Ако навреме не сте го платиле долгот, ратата за кредитот, тогаш ќе се соочите се секојдневни јавувања, со кои банкарските работници ве предупредуваат дека веднаш треба да си платите, бидејќи во спротивно, ќе ви биде активирана хипотеката. Весниците во последно време се полни со огласи за продажба на станови, куќи, земјиште, деловни објекти, за кои банките закажуваат лицитации на кои се продава запленетиот имот. Се' повеќе граѓани не ни помислуваат да бидат и нечиј жирант за кредит, па дури ниту на најдобриот пријател.

И додека на граѓаните и онака им е страв да влезат во банка, ама мораат, и натаму е присутно мислењето според кое во банките ве дочекуваат најнеуслужните работници.

Тоа го потврдуваат и тајните купувачи. Веќе втора година едноподруго откако невладините организации преку тајни купувачи го истражуваат квалитетот на услугите во повеќе дејности, оценката е дека најплатените, банкарските шалтерски работници, од граѓаните добиваат најниски оценки за услугата. „Резултатите покажаа дека банкарските шалтерски работници во Македонија се наоѓаат на 6. место, од седум испитувани категории. Во ова истражување беа оценувани пет основни елементи што ја сочинуваат добрата услуга, односно поздравување, утврдување на потребите, објаснување на производот - услугата, нудење дополнителен производ, услуга и заблагодарување за посетата. Најслаб резултат е забележан кај нудењето дополнителен производ и заблагодарувањето за посетата, што претставуваат алармантно ниски резултати според светските стандарди за квалитет на услуга. Од овие елементи, кај банкарските службеници со највисок резултат беше оценето објаснувањето на производот, што укажува дека техничкото познавање на службениците е на високо ниво“, вели Катерина Котлареска од „Свот“.

Ова покажува дека не се секогаш добрите плати, кои во банкарскиот сектор во просек изнесуваат околу 35 илјади денари, доволна мотивација и за трпеливост и љубезност кон клиентите и професионално извршување на работата.

Банкарите велат дека се' почесто одговорот за подобрување на квалитетот на услугата го бараат во младите кадри. „Генерално, НЛБ Тутунска банка вработува млади и високообразовани кадри. Посветуваме големо внимание на добрата услуга. Имаме интерни и екстерни обуки за шалтерските работници со клиенти. Резултатите од тоа се задоволителни и значителен е бројот на нови клиенти кои се придобиени токму поради добрата услуга“, смета Антонио Аргир, директор на деловна мрежа во НЛБ Тутунска банка.