Новиот албум на „Баклава“ на концерт во Универзална сала
Со концерт во Универзална сала, кој ќе се одржи на 1 март, етно составот „Баклава“ ќе го промовира второто ЦД „Калемар“. На концертот, премиерно, ќе биде изведен во целост нивниот нов албум кој веќе има и еден видео запис, за првата тема „Твојте очи Лено“. Новото ЦД е наречено „Калемар“ зашто музиката што ја создава „Баклава“ е „накалемена“ на традиционалната македонска песна, велат од „Баклава“.
На концертот, кој се совпаѓа со верскиот празник Прочка, ќе гостуваат и неколку музичари кои учествуваа во изготвувањето на „Калемар“. „Концертот ќе биде посветен на музиката, а не на специјални гости или ефекти. Очекуваме минимализам, без многу помпа, какви што се впрочем и нашите песни“, вели Дејан Сибиновски, член на „Баклава“.
„Баклава“ постои од 2003 година. Првиот концерт го одржа во 2005 година, во киното Фросина, од кој како запис излезе првиот албум „Баклава“, што, исто како и новиот, го издаде Скопскиот џез фестивал. Членови на составот се: Дејан Сибиновски, Елена Христова,Никола Николов и Владимир Мартиновски.
Етно составот планира мини турнеја низ Македонија на пролет, а најавени се и неколку гостувања во странство. (Н.П.) |
