Насилниците не' тепаат, а полицијата ни се потсмева!

Сексуалните работници бараат легализација на нивната професија и еднаквост пред законот

ГОРАН АДАМОВСКИ
ЈУЛИЈАНА КИМОВСКА

„Ме силуваше еден од клиентите, а потоа кога појдов во полиција за да пријавам, полицајците ми се изнасмеаја и ми рекоа дека самата сум си го барала“, раскажува една млада девојка од Скопје, која заработува нудејќи го своето тело. Нејзината трауматична исповед е една од многуте кои можат да се слушнат од сексуалните работници, кои сметаат дека постојано се стигматизирани, навредувани, уценувани, омаловажувани и малтретирани во општеството.Тоа е една од причините поради кои невладината организација ХОПС, чија цел е заштита на правата на ранливите групи, да застане зад нив заради посмела промоција на барањето на Здружението на сексуални работници. Една од тие активности беше и завчерашниот протест во центарот на Скопје, кога група млади луѓе кои даваат сексуални услуги, излегоа на улицата симболично отворајќи црвени чадори како крик против насилството и омаловажувањето спрема нив. Во исто време на страницата на ХОПС може да се најде линк до он-лајн петиција за поддршка на правата на сексуалните работници.

„Ние не бараме ништо друго, освен тоа што ни припаѓа според законот. Права и заштита, како и во сите други професии, кои се легализирани, еднаквост пред законот“, велат од Здружението на сексуални работници. Тие особено инсистираат да се внимава при изрекувањето етикети од типот „проститутки“, бидејќи тој израз кај нас е равенка на „неморал“.

„Сексуалните работници нудат услуги на улица, но и во салони каде што применуваат еротски масажи, стриптиз, порнографија, хот-лајн, придружба и слично. Тие се занимаваат со работа како и сите други, нудат услуги и од тоа заработуваат“, велат од Здружението. Тие се жалат дека во секојдневјето се опкружени со опасности од секаков вид, а притоа не се заштитени од никого.

„Најчесто сме цел на насилници, кои освен тоа што нема да платат за услугата што ја добиле, не' претепуваат, ограбуваат или, пак, ни се закануваат дека на сите ќе кажеле со што се занимаваме. Од полицијата немаме никаква заштита, напротив, обично ни се потсмеваат“, раскажуваат дел од нив. Поради тоа, тие се принудени да се снаоѓаат како што знаат и умеат. Некои од нив се здружуваат меѓу себе, други, пак, плаќаат приватно обезбедување, трети, пак, наоѓаат човек кој им помага при наоѓањето клиенти.

„Една од нашите пријателки беше киднапирана од клиент, кој, наводно, ја внесе во автомобилот за да добие сексуална услуга. Ја чуваше во стан речиси еден месец, за потоа да успее да побегне. По некое време, откако малку закрепна од стресот и стравот, пак, се врати на улица. Потоа и' дојде еден друг клиент, ја однесе на некое место, каде што ја чекаа шестмина мажи, ја силуваа, а потоа крвнички ја претепаа, кршејќи и' неколку ребра. Девојката веќе никогаш не продолжи да работи, а кога случајно се сретна со човекот што ја грабна првиот пат, тој само и' дофрли ‘подобро ќе ти беше да останеше кај мене‘“, е уште една од тажните приказни на овие луѓе.

„Бараме од Владата и до надлежните институции да го легализираат бизнисот со давање сексуални услуги, како што е случајот со западноевропските земји. Тогаш, многу полесно ќе спречи ширењето на сидата и другите преносливи болести, ќе се знае кој и каде работи, ќе се има ред. Во тој случај, би било подобро за државата, бидејќи ние би плаќале здравствено и пензиско осигурување, а би ги намирувале и даноците“, бараат од Здружението. Тие во завчерашниот протест во центарот на Скопје, по повод Меѓународниот ден за борба против насилството врз сексуалните работници, излегоа со пораки „Права, а не насилство!“ и „Сексуалната работа е работа“.

„Многу битно е да се разликува жртви од сексуална злоупотреба и сексуални работници, кои самите одлучиле да се занимаваат со оваа работа. Со тоа што го работат, не повредуваат никого и затоа општеството треба да има почит кон нивниот избор“, велат нашите соговорници. Тие особено се револтирани што стигматизацијата на општеството и досегашните законски одредби, им одмагаат на луѓето што се занимаваат со давање сексуални услуги.

„Нашата работа е нелегална, така што сме повеќе подложни на санкција. Конкретно, кога полицаец ќе фати жена што нуди сексуални услуги на улица, ја казнува со 600 до 800 евра. Нормално, за да може да ги врати парите, девојката е принудена на брза заработувачка, не бирајќи ги клиентите, односно не водејќи сметка дали имаат кондом, дали ќе ја повредат или ограбат. Од друга страна, тие што нема да ја платат казната, мораат во затвор, а бидејќи дел од нив имаат и деца, тие остануваат препуштени сами на себе. Едноставно, тоа е еден цел синџир, а никој ништо не презема да го пресече“, раскажуваат нашите соговорници, кои сметаат дека дошло времето посмело да ги бараат своите права, кои важат за сите, освен за нив.