Владиниот тим во поход за лечење на економијата
Владата ветува дека ќе работи на подобрување на конкурентноста и раст од 5 до 6 отсто
Александрија Стевковска
Владата, поточно министрите задолжени за спроведување на економскиот дел од програмата на партијата на власт, најавуваат дека следниве четири години ќе се фокусираат на борбата за енергетски развој, макорекономската стабилност, подобрување на бизнис-климата, привлекување странски директни инвестиции. Новата влада предвидува економски раст од 6 до 8 отсто, намалување на придонесите, намалување на невработеноста, подобрување на бизнис-климата, зголемување на приливот на странски инвестиции. Во владината програма се предвидени повеќе енергетски проекти, кои се врзани со рокови, изградба на коридорите 8 и 10, реконструкција на регионални и локални патишта, модернизација на железничкиот сообраќај.
„Еден од приоритетите на владата е воведувањето исплата на бруто-плати, од кои потоа ќе се плаќаат придонесите на вработените. Се планира и намалување на придонесите за здравствено и пензиско осигурување, но ќе се обидеме прво да ја воведеме практиката за исплата на бруто-плати, а потоа да се намалат придонесите, како придобивката од оваа мерка би отишла во рацете на работниците, а не на бизнисмените“, велат во владата.
Ваквата најава практично ги минира првичните најави дадени во „Преродбата во 100 чекори- надградена и проширена“ со која воведувањето на системот на бруто-плати е предвидено за 1 април идната година, а намалувањето на придонесите за почетокот на 2009, што беше во полза на сопанствениците.
Покрај исплата на бруто-плати, во економскиот дел новата влада ќе се фокусира на зголемување на конкурентноста на македонските производи и намалување на трговскиот дефицит. „Во наредниот период мора да работиме на обезбедување препознатливост на македонските производи, зголемување на нивната конкурентност, надминување на административните бариери за извоз, либерализација на пазарите за труд“, вели кандидатот за министер за економија, Фатимир Бесими.
Според него, владата треба да обезбеди можност за креативност на приватниот сектор, што ќе овозможи создавање иновативни и конкурентни производи.
„Не би сакал да прејудицирам кои сектори би се поддржувале, бидејќи треба да се обезбедат еднакви услови за работа. Пазарот е тој што ќе одреди кој сектор ќе биде водечки и кој ќе се наметне со својата конкурентност како еден од формите за намалување на трговскиот дефицит. Сепак, еден од начините за постигнување на таа цел е добра институционална поставеност која ќе овозможи легитимирање на конкурентноста“, додава Бесими.
Во услови од недостиг на струја и континуиран раст на цената на енергијата, владиниот економски тим најавува инвестиции во алтернативни извори на енергија. Новата влада во својата програма најави конкретни проекти како да се надмине кризата со енергија, преку гасифицирање на поголем дел од државата, нови руднички капацитети, изградба на комбинирана електрана-топлана, изградба на големи и мали хидроцентрали преку концесии, реализација на проектот Вардарска Долина, модернизација на ТЕЦ „Неготино“.
Според Бесими, треба да се инвестира во производните капацитети на хидро и термоцентралите како „Чебрен“ и „Галиште“, додека за ТЕЦ „Неготино“ која се продаваше во времето кога Бесими беше министер, засега нема план да се бара стратегиски инвеститор.
„Ќе се потрудиме да се искористи рационално тој капацитет од аспект на поефикасна и поевтина електрична енергија. ТЕЦ „Неготино“ не се гледа како поединечен проект, туку во пакет со целиот енергетски сектор“, објаснува идниот министер за економија.
|
