Македонија нема да ја заобиколи глобалното затоплување

СНЕЖАНА КАЛАБАКОВА
Глобалното затоплување на Земјината топка е неизбежно. Концентрацијата на гасови и ефектот на стаклена градина се причина со покачувањето на температурата на воздухот. Ова лето климатските промени се почувствува и во Македонија, а температурите го достигнаа 43 Целзиусов степен. Се прогнозира дека до 2100 година надворешната средна температура ќе порасне за 4,6 Целзиусови степени, додека просечната температура ќе биде 23,8 степени. Со тоа ќе се создаде дополнителен ризик од временски непогоди како што се поплави, суши, но ќе дојде и до топење на глечерите кои ќе го зголемат нивото на морињата за дури еден метар. Ова е едно од гледиштата што најчесто се слуша на научните дискусии за глобалното затоплување. Ставовите се' уште се поделени. Друга група експерти, пак, тврдат дека стравот од глобалното затоплување е претеран и дека живата расте со растот урбанизацијата во градовите. Македонските експерти тврдат дека и нашава земја нема да ја заобиколи глобалното затоплување, па затоа треба да се размислува однапред за нови начини на живеење. Потребно ќе е и ново реонирање на земјоделските култури, кои треба да се заменат со култури кои ќе можат да издржуваат подолг сушен период. Во иднина не ќе може да се замисли ниту живеење без клима-уред, но и без градби заштитени со квалитетни изолациони материјали. Експертите и државните институции во Македонија ќе мораат многу сериозно да размислуваат и државата да издвојува средства за максимално користење на сончевата енергија, енергијата на ветрот и водата, која во Македонија ја има во изобилие.

„Трагедија е колку ние малку ја користиме сончевата енергија. Во 1980 година од локални умови имаше идеја за изградба на сончева електрана. Но, овие умови никој сериозно не ги сфаќа и не ги користи. Во поранешна Југославија 1981 година имав сериозен проект за искористување на енергијата на ветерот и го презентирав во Сараево. Се' остана на таа презентација. Еве, сега за поздравување е проектот за изградба на 400 мали хидроцентрали“, вели Пеце Ристевски, климатолог од Управтата за хидрометеоролошки работи.

Тој додава дека наместо војна за црно злато, во иднина ќе се води војна за вода, која и кај нас одамна е почната. Најпрвин беше Вевчани-Октиси, а потоа Кичево-Прилеп за водоводот „Студенчица“. Притоа, објаснува дека глобалното затоплување е проблем на глобалната заедница.

„И Македонија е потписник на рамковната конвенција за климатските промени. Од неа излегува обврската на земјава за извештајот што го подготви во 2003 година и вториот што го подготвува годинава. Следен важен документ е Кјото-протоколот донесен 1997 година, кон кој Македонија пристапи во 2002 година. Од сите овие документи излегува обврската на земјава во периодот од идната година до 2012 година да се вратиме на стакленичките гасови од 1990 година. Паралелно со овие конвенции државава има стратегија за земјоделство, шумарство, водостопанство, биодиверзитет и здравје“, вели Ристевски.