Патот Кавадарци - Ресава ги зеде првите жртви

КАВАДАРЦИ - Со реконструкцијата на патот, кој го поврзува Кавадарци со Тиквешкото Езеро, возачите се охрабрија да возат со многу поголема брзина, бидејќи новиот слој на асфалт го дозволува тоа. Поради неприспособена брзина се случија и неколку сообраќајни несреќи во кои има и загинати. Од тие причини, локалната самоуправа апелира до возачите по шест километри долгиот пат Кавадарци - Ресава многу поодговорно да се однесуваат при управувањето со моторните возила.

„Забележливо е дека дел од возачите и натаму недисциплинирано возат по реконструираниот и проширен пат“, велат од Општината.

Согласно со прописите, изведувачот на работите ГП „Гранит“, на почетокот и на крајот од реконструираната делница, има поставени соодветни сообраќајни знаци, кои покажуваат ограничување на движењето на возилото со брзина поголема од 30 км/час. Од Службата за односи со јавноста при Општина Кавадарци велат дека работат и на хоризонталната сообраќајна сигнализација. Согласно важечката законска регулатива, извршено е и обележување со средишна бела линија во вкупна должина од 5.800 метри, од кои 5.000 м се полна линија, која забранува претекнување и движење со поголеми брзини од моментно означените. И во наредниот период ќе се работи и ќе се комплетира сообраќајната сигнализација. (А.Д.)