За Кокино се бара заштита од УНЕСКО

Доставена апликација за влегување на локалитетот на светската листа, каде што Охрид е веќе 30 години

Катерина Богоева


Локалитетот Кокино кој се смета за исклучителен архео-астрономски локалитет и по неколугодишно чекање во земјава се здоби со статус на културно наследство од особено значење (со поткатегорија исклучително значење), годинава ќе чека да биде ставен на листата на светско наследство на УНЕСКО, за што веќе е доставена и потребната апликација.

„Ќе се обидеме да го впишеме на листата“, најави вчера Министерската за култура Елизабета Канческа - Милевска во својство и на претседател на Националната комисија на УНЕСКО, информирајќи и за активностите поврзани со заштитата на природното и културното наследство на охридскиот регион, за изработениот план за управување и за предвидената законска заштита.

Министерството за култура и Управата за заштита на културното наследство до Комитетот за Светското наследство на Париз ја доставиле конечната верзија на Планот за управување со природното и културното наследство на охридскиот регион, со кој се предвидува регионот да добие конкретен и посоодветен третман на координирано управување од сите институции, инволвирани во неговата заштита.

“Охридскиот регион како светско природно и културно наследство, подолг период се соочува со проблеми во однос на неговото управување. И во јавноста се познати појавите на нарушување или неимплементирање на одредбите од Конвенцијата на УНЕСКО за ова наследство. Долгогодишната потреба од подготовка на Планот е резултат и на обврските произлезени од периодичните извештаи кои, како земја потписничка на Конвенцијата ги доставуваме до Комитетот за Светско наследство“ изјави меѓудругото Министерката за култура, изразувајќи уверување дека Планот ќе биде институционална рамка во која општините Охрид, Струга и Дебарца и останатите субјекти координирано ќе вложат напори да се заштитат и зачуваат охридскиот регион и самиот град Охрид, кој годинава ќе прославува 30 години од впишувањето на УНЕСКО -вата листа.

Вчера беше најавено и дека владата неделава треба да го разгледа доставениот Закон за управување со светското природно и културно наследство на охридскиот регион, изготвуван паралелно со споменатиот План. Законот се смета за прв таков документ што ќе ги имплементира обврските кои произлегуваат од Конвенцијата, а годинава се планира и изготвување на закон за прогласување на старото градско јадро на Охрид за споменична целина од особено значење. Со донесување на двата закона и со Планот треба да се заокружи правната рамка за интегрирано управување со светското природно и културно наследство во охридскиот регион, согласно со современите начела за заштита и меѓународни стандарди.

„Верувам дека апликацијата за ставање на Кокино на листата на светско наследство ќе биде прифатена, Кокино е сведоштво за постоење на една духовна култура на просторот што претходно се сметаше за варварски, неисполнет со духовни вредности. Тука на едно место се среќава света планина со евидентирано постоење на три култни обреди од бронзениот период и мегалистка опсерваторија. Тоа се факти кои говорат за неговата исклучителна вредност“- изјави вчера археологот Јовица Станковски, истражувач на вредниот локалитет и директор на Народен музеј од Куманово.

Тој напомена дека годинава локалитетот Кокино е вбројан во капиталните археолошки проекти на владата, што значи дека и средствата за негово истражување ќе бидат двојно или тројно поголеми. „Досега истражувавме со релативно малку пари, а годинава планираме да го доистражиме врвот на локалитетот“.