ФИЛАТЕЛИЈА

Четири медали за македонските филателисти

Последните години македонските филателисти го свртеа вниманието во Европа со своите колекции на марки на разни теми и речиси од секоја меѓународна изложба се враќаат со медали и признанија. Како што не' извести претседателот на Сојузот на филателистите на Македонија, Стево Савевски, на меѓународната изложба „Италија 2009“, што се одржа во Рим, филателистите од нашата земја освоија еден сребрен и три бронзени медали. Тоа, секако, претставува навистина голем успех во мошне силна конкуренција на најпознати филателисти од Европа.

За својата колекција на тема „Свети Кирил и Методиј“, Климе Поповски е награден со сребрен медал, додека добитници на бронзени медали се: Димитар Свирков за колекцијата „Мајка Тереза“, Синиша Павлевски за својата збирка на издадени марки на тема „Папагали“, како и Лилјана Атанасова, која на изложбата учествуваше со својата вредна колекција „Коњи“.

Големо признание на македонските филателисти беше и улогата на комесар на изложбата што ја извршуваше Синиша Павлевски.

Македонските филателисти се подготвуваат и за големиот јубилеј, 60 години од формирањето на Сојузот, во текот на јануари идната година кога ќе биде издадена и посебна монографија за сите издадени марки во Македонија и успесите на нејзините членови на меѓународните изложби. (М.М.)