Поглед

Сами се изолираме

Соња Крамарска

Македонија не беше меѓу учесниците на интернационалната изложба во Сарагоза, Шпанија, посветена на водите, нивната експлоатација и нивното значење за натамошниот опстанок на планетата. Можеби некому ќе му изгледа смешна критиката за тоа, но поентата е во фактот што односот кон такви собири, всушност, покажува колку нашата земја и ние како нација заостануваме зад другите земји.

Кога ќе погледнеме што дискутираме ние овде, а што дискутира светот кој е во буквална паника за опстанокот на планетата што се доведува во прашање поради опасноста од недостиг од храна и вода, тогаш е јасна незаинтересираноста за патување во далечната Сарагоза.

Нам тоа не ни е на дневен ред. Но, нашите соседи Бугарија, Грција, Хрватска, Албанија добро ја разбираат смислата на ваквите „екскурзии“ и се појавија во шпанскиот град. Колку да го потсетат светот на себе.

Македонија, по се' изгледа, нема потреба ниту од такво нешто. Ние сме си доволни самите на себе. Нема зошто да се мешаме со останатиот дел на светот. Не не' интересираа недостигот од вода, лошото управување со овој основен природен ресурс, експанзијата на население.

Нашата земја е со светлосни години далеку од ваквите теми. Можеби и со право. Овие теми ја допираат цивилизацијата, а ние не сме ни стапнале таму. Се' уште не знаеме како ќе ни се вика државата, каде ќе се протега границата, на кој јазик или јазици ќе зборуваме во сопствената земја. Со таква „агенда“ изгледа смешно некој да мисли на тоа дали утре оваа земја ќе има доволно вода.

Но, не е смешно, туку е жално. Се изолираме самите од светот, свесно или несвесно.