Фантомска фирма го гради хотелот зад „Рамстор“

Фирмата ХЛХ, што купи земјиште зад „Рамстор“ во Скопје за изградба на хотел, е фантомска и нема никакви активности, обвини вчера пратеникот од СДСМ, Јани Макрадули. Тој се повика на извод од лондонскиот Централен регистар од кој јасно се гледа дека оваа фирма нема никакви деловни активности. Од Министерството за транспорт и врски експресно реагираа демантирајќи какви било нерегуларности.

„Воопшто не станува збор за лобирање за НАТО, туку за владин криминал и корупција“, изјави вчера Макрадули, коментирајќи го пишувањето во британскиот весник „Дејли телеграф“ дека продажбата на локацијата под поповолни услови била направена како замена за лобирање за влез на Македонија во НАТО и во ЕУ.

Според изводот од Централниот регистар во Лондон, што го презентираше Макрадули, произлегува дека фирмата „ХЛХ Маседонија ЛЛП“ била регистрирана на 12 јули 2007 година, но освен адресата на седиштето нема податоци за телефон, факс, Интернет-страница итн. Исто така, нема никакви податоци за остварен профит или загуба, како за какво било движење на капиталот, обрт, платени даноци, дивиденди и слично.

Во историјата на фирмата се наведени неколку промени на седиштето, како и нови членови на бордот, промена на името и слично, но нема податоци за постојни директори и други службеници. Празни се и полињата сврзани со развојот на фирмата (средства, обврски, резерви, капитал...), потоа за движење на готовинскиот тек, ликвидноста, повратот на капиталот итн. Овие податоци се однесуваат на 2008 и на 2009 година.

Поради ова, како што рече Макрадули, јасно е дека фирмата ХЛХ , која победи на тендерот за земјиштето за хотелот, не ги исполнила тендерските услови и е алатка за политичко пазарење. Макрадули очекува соодветна постапка од надлежните институции за аферата. 

Во реакцијата на Министерството за транспорт и врски, пак, се вели дека СДСМ, во недостиг на креативни проекти и идеи, се обидува политички да поентира со изнесување невистини и дезинформации. Според Министерството, групацијата ХЛХ имала обезбедено франшиза од хотелската групација „Резидор“ (The Rezidor Hotel Group) за изградба на хотел во нашата земја.

„Министерството работи во согласност со законската регулатива, за разлика од времето кога СДСМ беше на власт“, е наведено во реакцијата. Притоа се додава дека за разлика од СДСМ, кој продал земјиште во центарот на Скопје во четири очи и без јавно наддавање по цена од 1.500 денари за квадратен метар, земјиштето за изградба на хотел „беше отуѓено по пат на јавно наддавање со седумкратно повисока постигната цена, што изнесува 8.500 денари за квадратен метар со што во буџетот се внесоа 41.905.000 денари“. (М.Ј.)