Поглед

Самоволие во Чаир

Билјана Ангеловска

Почетокот на реставрацијата на старата со закон заштитена куќа на Јашар-беј Кумбараџи во Скопје уште еднаш ја покажа сета несериозност во сфаќањето на она што значи нечија одговорност. Однесувањето на градоначалникот на Чаир, Изет Меџити, кон наследството на сопствената општина, својот град и држава, потврдува дека партиските цели се далеку пред државните интереси.

Тој на идентичен начин, самоволно и самобендисано ја спроведе париската директива преточена како сопствена волја и кога го подигна споменикот на Скендер-бег и кога ја почна изградбата на портата во Старата чаршија. И тогаш Меџити беше глув за јавните негативни реакции и не ги почитуваше законските прописи. Сам си даде дозволи за градба, сам си ги спроведе инспекциските надзори.

Однесувањето на Меџити го покажува самоволието што владее во државава. Не важат никакви закони, многумина прават што сакаат и како што сакаат, бидејќи државата не реагира. Општина Чаир е доказ дека правната држава пука по сите шевови. Негодувањето на првиот човек на Управата за заштита на културното наследство, Паско Кузман, делува бледо, неговата реакција е задоцнета, тој допрва за активностите ќе ги известува надлежните институции. Од Министерството за култура молк.

Никој нема ништо против изградба на музеи, против реставрација на стари објекти, нивно заживување. Но, тоа мора да биде во регуларна постапка, во рамки на законските прописи. А не секој градоначалник да работи самоволно во својата општина и да создава сопствена држава во рамките на еден град. На таквото дејствување мора да му се стави крај, бидејќи не носи ништо добро, ниту за граѓаните, ниту пак за државата во целина.