Претходен број

Машина за вселената на „Микросам“

Прилепската фирма произведе машина за производство на композитни материјали за сателитската индустрија

Машина за производство на композитни материјали кои наоѓаат своја примена во сателитската индустрија е последното достигнување на прилепски „Микросам“. Деновиве машината ќе биде испорачана на купувачот, деловен партнер во Европа. Оваа врвна технологија има повеќекратна намена и според познавачите на приликите е единствена машина во светот од ваков вид.

„Ова е машина за производство на импрегнирани карбонски влакна кои имаат примена за вселенската технологија. Машината е флексибилна,од универзален тип и ќе произведува материјали за новата генерација на сателити, со примена на технологии што ги поседуваат високоразвиените земји“, вели Димитар Богданоски, директор за маркетинг во „Микросам“.

На овој врвен проект на „Микросам“ седум-осум месеци работел тим од четворица инженери.

Освен „Микросам“, слична, но не толку совршена машина досега произвеле специјализирани компании во Германија, Швајцарија и САД.

„Практично со оваа машина ’Микросам‘ и Македонија влегоа на мапата на производители на опрема со висока технологија за производство на материјали од карбонски влакна. И името на компанијата-купувач и цената се деловна тајна“, истакнува Богданоски.

„Микросам“ работи и на проект - нова машина која ќе најде примена во авионската индустрија. Во завршна фаза е развојот на многу комплициран софтвер, кој е еден од главните компоненти на машината.

Инаку, „Микросам“ располага со врвен технички и кадровски потенцијал. Од вкупно 50 вработени, 30-мина се инженери, високостручен кадар, универзитетски професори, кои се вклучуваат при реализација на софистицирани проекти. „Микросам“ е компанијата која го произведе и првиот македонски индустриски робот. (М.Т.)