Претходен број

Младите на СДСМ бараат од ВМРО-ДПМНЕ да се огради од МСУ

Тие сметаат дека фотографиите со маскирани членови на МСУ e срамота и навреда за младите

На објавените фотографии на „Фејсбук“ на членови на таканаречената Македонска студентска унија, на кои нивни членови се фотографирале со фантомки на главите и со пиштоли и ками, вчера следуваше реакција на Социјалдемократската младина.

Младите социјалдемократи најостро го осудуваат, како што велат, „скандалот со фотографиите на таканаречената МСУ и изјавите на претставниците на оваа фантомска организација, за која до инцидентот на градскиот плоштад никој немаше слушнато, дека нивните фотографии со пиштоли се маскенбал, срамота и навреда за младите“.

Социјалдемократската младина за МСУ вели дека најпрво го оправдала тепањето на студенти, жени и деца на централниот скопски плоштад, а сега тие можат да се видат на фотографии со пиштоли и пред знамето на ВМРО- ДПМНЕ. Младите на СДСМ изразуваат загриженост, како од индиректното повикување на насилство врз секој кој не мисли како младите во ВМРО- ДПМНЕ, така и од се' почестите појави на насилство кај младите луѓе. Тие ја повикаа ВМРО-ДПМНЕ да се огради и да го осуди скандалот со фотографиите на членови на Македонска студентска унија, а доколку тоа не биде сторено ќе сметаат дека токму владејачката партија се крие зад ваквите бројни „владино-невладини организации, кои всушност го зборуваат и го промовираат она за што се залага владејачката партија“.

Објавувањето на фотографии на членови на МСУ, на кои тие се маскирани како припадници на баскиската ЕТА, несомнено претставуваше шок за домашната јавност и покрај тоа што генералниот секретар на МСУ, Оливер Димитриовски, тврдеше оти станува збор за првоаприлски маскенбал, кој се одржал пред една или две години. Според Димитровски, пиштолот и камата кои можат да се видат на фотографиите не се вистински.

Македонската студентска унија на јавноста и' стана позната по соопштувањето на нивниот став, а во врска со изградбата на црква на плоштадот „Македонија“ во Скопје. Нивни претставници, само ден по претепувањето на студентите од Архитектонскиот факултет, не само што не застанаа зад нивните колеги, туку рекоа дека неколку клоци и тупаници не се којзнае што, но и тоа дека се за изградба на црква на плоштадот „Македонија“. Во своето соопштение тие упатија и осуда до одредени печатени и електронски медиуми. Сето ова придонесе за осудата на ставовите на МСУ како обид за подгревање на тензиите, ксенофобија и верска нетрпеливост, но МСУ отворено се спротивстави и на укинувањето на веронауката во осмолетките.

За она што беше објавено од членовите на МСУ од МВР велат дека никој не го пријавил случајот за да можат да реагираат, иако преовладува мислење дека она што се објавува на „Фејсбук“ е несериозна, но и лична работа на сите оние кои го практикуваат ваквиот начин на комуницирање. (Љ.С.)