Иванов: Грчкото вето ни ги избрка инвеститорите

На иселениците им се малку три места во парламентот

Берн - Односите меѓу Македонија и Швајцарија се многу добри и без отворени прашања, а особено во делот на економската соработка, каде што постои можност за натамошно подобрување, оценија претседателите на двете земји, Ѓорге Иванов и Дорис Лојтхард, по денешната средба во замокот Лохн во Керзац крај Берн.

„Се договоривме и натаму да ја продлабочиме нашата соработка, особено во делот на животната средина, водоснабдувањето и полициската соработка. Во интерес на Швајцарија е мирен и стабилен Балкан, поради што ќе продолжиме да ја поддржуваме Македонија во нејзините напори да стане членка на Европската унија“, изјави претседателката Лојтхард.

Претседателот Иванов се заблагодари за помошта што и' ја дава Швајцарија на Македонија за да ги достигне критериумите на НАТО и на ЕУ и со тоа да ги исполни стратегиските приоритети. Тој нагласи дека има голем простор за зголемување на економската соработка меѓу двете земи и додаде дека македонската дијаспора, која брои над 60.000 лица во Швајцарија може да биде мост на поврзување.

Прашан колку сопирањето на интегративните процеси влијае врз безбедноста на Македонија, претседателот Иванов оцени дека тоа не влијае само на безбедноста во државата, туку и на целиот регион.

„Билатералниот проблем го блокира процесот на стабилизација на целиот регион, а блокирањето на членството во НАТО од страна на Грција придонесе за откажување на најавените инвестиции во Македонија“, рече Иванов.

Замолена за коментар за проблемот што го наметнува Грција со името на Македонија, швајцарската претседателка Лојтхард рече дека не е работа на Швајцарија да коментира спорови меѓу две држави.

„Швајцарија секогаш учествува во решавањето на конфликти и ја нуди својата помош, но за да може да го направи тоа потребно е да се поднесе барање. Досега никој до нас не поднел барање за помош во спорот со името“, рече Лојтхард и додаде оти се недева дека зачестените билатерални средби меѓу претставници на Македонија и на Грција ќе помогнат да се најде заемно прифатливо решение.

Според неа, одолговлекувањето на почетокот на преговорите на Македонија со ЕУ ќе придонесе за демотивирање на населението.

Претседателот Иванов на средбата со иселениците ги повика да вложат во Македонија преку отворање мешовити македонско-швајцарски фирми и им порача оти во нивната татковина се прави се' за да се креира поволна бизнис- клима. Иселениците се интересираа за начинот на кој ќе се спроведе гласањето на дијаспората и побараа да се зајакне капацитетот на Агенцијата за иселеништво. Според нив, само трите предвидени места за пратеници во Собранието од дијаспората се многу малку. Тие се интересираа и за политичките поделби во Македонија, на што претседателот Иванов им одговори дека земјата е во фаза на учење демократија.

„Партиите се создадени да го делат народот, а претседателот да го обединува. Правам се' за тоа, но, за жал, премногу сме политички поделени“, рече Иванов, додавајќи дека луѓето ќе престанат да се интересираат за политика кога ќе зајакне економијата. (MИA)