Убијците се кријат во соседството?

Дали ќе следува полициска акција во неколку балкански држави

„Моите информации говорат дека наскоро во две до три балкански земји, ќе има апсење на убијците. Откривањето на извршителите на масакрот кај Смилковци ќе биде силен стабилизирачки фактор и ќе се надминат дилемите кој стои зад овој теористички акт, поопасен и со поголеми последици од обидот за атентат на претседателот Киро Глигоров“. Ова е дел од интервјуто на ексминистерот за внатрешни работи, Павле Трајанов дадено за српски „Вести Онлајн“. Најавата за скоро апсење на петкратните убијци и тоа во заедничка акција на полициите од регионот, предизвика големо внимание во јавноста, поради што вчера го побаравме Трајанов. Тој објаснува дека изјавата ја дал во контекст на гласиштата за дестабилизација на регионот и оперирањето на две паравоени групи во северно Косово.

„Треба да се работи на превенирање. Важно е косовската полиција, меѓународните сили во Косово, како и македонската и српската полиција да превенираат и да го неутрализираат криминалот за да не ни се случуваат вакви злосторства што може да го дестабилизираат регионот“, вели Трајанов.

Во МВР и натаму молк за истрагата по суровите убиства кај Радишани што се случија пред две и пол недели. Премиерот Никола Груевски вчера уште еднаш изјави дека истрагата оди во добар правец, без да бидат прецизирани детали. Од друга страна, се' погласни се шпекулациите дека истрагата тапка во место, но надлежните уверуваат дека работат добро и бараат време за убијците да се најдат пред лицето на правдата. (Г.А)