25.12.2006, 18:11 Македонија поблиска со Северна Кореја отколку со Јужна
Петнаесет години по независноста, Македонија се' уште не успева да воспостави дипломатски односи со Јужна Кореја, но нема таков проблем со Северна Кореја, и тоа под уставното име.
Ваквата информација вчера ја потврдија извори од нашето Министерство за надворешни работи по ваквото откритие од страна на министерот задолжен за странски инвестиции, Глигор Ташковиќ, за време на неговата посета на Јужна Кореја деновиве. Обидот на Ташковиќ да анимира јужнокорејски инвестиции во Македонија се сопна на оваа политичка пречка, која од необјасниви причини трае предолго и никако да заврши со дипломатски односи меѓу Скопје и Сеул.
Од МНР вчера изјавија дека разговорите со Јужна Кореја за воспоставување на дипломатските односи започнале од 2000 година, дека процесот е многу бавен, но се одвива во добра насока, па очекуваат наскоро да се реши овој проблем. Од МНР велат дека причината, наводно, не е околу уставното име на нашата држава, туку дефокусираноста на Сеул, кој ја туркал кандидатурата на тамошниот шеф на дипломатијата, Бан Ки Мун, за генерален секретар на ОН, поради што биле запоставени преговорите со Македонија. Од МНР посочуваат на фактот дека досега, во билатералната комуникација, Јужна Кореја го употребувала уставното име на земјава, па не се очекува тоа да биде пречка да се затвори прашањето со дипломатските односи. Моментално Македонија поради уставното име нема дипломатски односи и со две европски земји (Кипар и Малта), а од поголемите нема ниту со Сирија, но поради политичкиот имиџ на оваа земја, не се сфаќа тоа како хендикеп за земјава. (С.Ј.) |
