Средбите со автори и промоциите привлекоа посетители
Денеска ќе бидат соопштени добитниците на традиционалните награди на Саемот на книгата
Читателите бараа примерок повеќе од „Нишан“ на Блаже Миневски
Невена Поповска
Добитниците на наградите за најдобро издание меѓу двата саема, најпродавана книга на Саемот, за најдобар книжар и библиотекар, кои традиционално се доделуваат на Меѓународниот саем на книга свечено ќе бидат денеска соопштени. Нив ги доделува Здружението на издавачи и книжари на Македонија и како што ни соопшти Ели Маказлиева, имало големо интересирање за овие признанија од страна на издавачите, а жири-комисијата во состав: Паскал Гилевски, Илхами Емин и Александар Цветковски до доцна вечерта ги разгледувале апликациите.Од Здружението велат дека најголемо задоволство им претставува што од годинава ја востановиле наградата за најстар писател, со тенденција да стане традиционална
„Скриена Македонија“ од Делисо предизвика големо интересирање
Саемот на книгата како најголема концентрација на книжевни и илустрирани дела од странски и домашни автори протекува во динамична атмосфера за разлика од правите денови кога посетеноста беше на пониско ниво. Издавачите на сопствените штандови организираат средби со авторите, промоции итн, се со цел да ги анимираат читателите. Така на штандот во „Матица“, вчера гостуваше авторот Кристофер Делисо, кој потпишуваше примероци од книгата „Скриена Македонија“ и предизвика големо внимание кај посетителите на Саемот.
Книгата на Владислав Бајац ја претставија Александар Прокопиев и Елизабета Шелева
„Книгата за бамбусот“ од Владислав Бајац на штандот на „Три“ ја претставија Александар Прокопиев и Елизабета Шелева, а лауреатот на наградите „Стале Попов“ и „Роман на годината“ на „Утрински весник“, Блаже Миневски својот роман „Нишан“ го потпишуваше на штандот на „Макавеј“. Кирил Темков го промовираше најновиот роман што го објави „Детска радост“. Станува збор за книгата „Цената на едно дете“ Од Мари-Франс Бот и Жан-Пол Мари. | 
