Џон Тери по стапките на Тајгер Вудс

Англиските медиуми не престануваат да пишуваат за аферата на Џон Тери, кој ја загуби и капитенската лента во репрезентацијата поради љубовната врска со бившата девојка на Вејн Бриџ. Како што е веќе познато, Тери бил кратко во врска со Ванеса Пиронсел (мајка на детето на Бриџ), а кога дознал дека е бремена и платил за абортус.

Наводно, и понудил и 500.000 евра само да молчи за аферата. Но, Пиронсел не е првата на листата на љубовници на Тери. Тој преку посредници се обидел да ги замолчи и преостанатите четири. За таа цел дури неколку пати кревал хипотеки на своите недвижности. Така за сопствениот имот во седум години кренал четири хипотеки, а вкупната сума ја надминала вистинската вредност на куќата за околу милион евра. Тери се врзува со уште неколку малверзации. Неодамна демантираше дека за 10.000 евра овозможил приватно разгледување на тренинг центарот на Челзи. Тогаш беше изигран од новинарите на „Њус оф д ворлд“, кои добро одглумија дека се' ќе направат само да видат каде тоа се подготвува Челзи.

Инаку, изневерената сопруга Тони со децата, семејството и пријателите одмора во Дубаи. Двајцата се во брак од 2006 година, 13 месеци откако ги добија близнаците. Додека Тони била бремена, наводно, Тери имал кратка авантура со ѕвездата на „Велики Брат“ Мекалистер.

Целава приказна многу потсетува на онаа на славниот голфер Тајгер Вудс, кому неодамна му беа откриени десетици љубовни авантури. Сопругата најпрвин го напушти, па му се врати. Но, не му се вратија спонзорите кои решија да ги раскинат договорите. Медиумите во Англија предвидуваат дека Тери ќе загуби околу 16 милиони евра поради акциите надвор од брачниот кревет.

Пред неколку дена селекторот на Англија Фабио Капело специјално допатува во Лондон на средба со Тери на која заеднички решија дека дефанизвецот на Челзи повеќе нема да биде капитен на репрезентацијата. Со цел да се смират страстите пред СП во Јужна Африка во јуни годинава. Прашање е дали тоа ќе го реши проблемот бидејќи и Вејн Бриџ е дел од најсилниот состав. Некои англиски новинари предвидуваат дека доколку еден од нив не остане дома атмосферата во соблекувалната ќе биде катастрофална, ќе се создадат две крила, кои нема да може да ги спои ниту новиот капитен Рио Фердинанд.