„Бранот“ се' уште не го погодил Охрид

Партиското членство и охридското раководство на ВМРО-ДПМНЕ многу повеќе внимание посветуваат на претстојните локални избори

Веле Митаноски



Охрид - Иако велат дека дури од втората половина на годината ќе влезат во официјални подготовки за кампања за претстојните локални избори, сепак, во структурите на охридскиот огранок на ВМРО-ДПМНЕ се чувствува големо раздвижување. Тоа што на последната трибина не дојде лидерот Никола Груевски, иако беше најавен, можеби било само случајност, но локалното раководство на партијата не крие дека одамна им е ставено до знаење дека ако повторно го изгубат Охрид на наредните избори, ниеден од нив нема да остане на „сцената“.

Нема сомнение дека свое влијание во раздвижувањето ќе има „новиот бран”, меѓутоа во Охрид бранот не се очекува со некое посебно возбудување, освен како декларација во однос на политичкиот противник. Овде навистина се инсистира на промени и тоа многу жестоко, но само колку на опозицијата да и' се даде на знаење дека на охриѓани им се повеќе од потребни промени, бидејќи два мандата на градоначалничкото место е човек од СДСМ. Всушност, охридските вмровци и немаат многу свои „автохтони“ членови на истурени позиции. Навистина, најблиските соработници на Груевски се од Охрид и Охридско ( Ставрески, Вељаноски, Јанкулоска...), но тие одамна се преселени во Скопје и можат да се доживуваат како „роднокрајни“, но не дека произлегле од нивната партиска организација. Освен двајцата пратеници Александар Николоски и Харалампие Шокаровски, како и директорот на ЈП за стопанисување со станбен фонд, Цветко Грозданов, кој, пак, би сакал да се врати назад како градоначалник, што му е желба која не ја крие.

Во секој случај, за кадрите од ВМРО-ДПМНЕ во Охрид допрва ќе се одлучува. Раководството на Општинската организација било вклучено во анализата. Изминатите месеци партијата извршила анкетирање на различни целни групи за работата на функционерите во Охрид, врз основа на кое ќе биде донесена одлуката за смена на раководители во институции каде на одговорни позиции се функционери од ВМРО-ДПМНЕ. Сепак, засега не се спомнуваат конкретни имиња на функционерите што ќе бидат опфатени со новиот бран. Она што може да се дознае е дека во Охрид ќе биде извршена промена на најмалку десетина функционери, од нив за тројца има дополнителен мониторинг. Засега единствено е извршена смена на директорот на ЕЛЕМ, Влатко Чинговски, кој е по потекло од Охрид.

Од друга страна, неподелено е мислењето дека партиското членство и охридското раководство на ВМРО-ДПМНЕ многу повеќе внимание посветуваат на претстојните локални избори, отколку на „бранот“. Иако не кријат дека конечната одлука за сите кандидати со кои ќе се настапи на локалните избори в година ќе биде донесена од страна на Извршниот комитет и лидерот Груевски, кој, пак, ќе мора многу да мери пред да пресече, ако не сака уште едно фијаско во Охрид. Добрите познавачи велат дека Груевски може и да изненади со кандидат кој досега не бил многу партиски експониран, но е чесен и „неизвалкан“ што би бил ссодветен одговор на сегашната персонална констелација.

Претседателот на ОК на ВМРО-ДПМНЕ во Охрид, Атанаско Михаилов не сака да говори за својата позиција, но не ги отфрла промените, за кои смета дека им се потребни на охриѓани, но мисли, пред се' на локалната власт. Михаилов ветува промени кои ќе ги донесе неговата партија, како што вели, со квалитетен и чесен тим кој со Охрид ќе управува на многу подобар начин.

„Локалната власт на СДСМ во Охрид чмае веќе 8 години и создава нови проблеми, а ништо не прави за градот освен за своите лични интереси. Ние работиме на тоа да понудиме тим со издржана програма и визија, кој ќе отвори нова страница за Охрид и ќе го врати оптимизмот кај охриѓани. До кандидатот ќе дојдеме низ широка дебата и преку анкетирање на јавното мислење и внатре во партијата. На сличен начин ќе се избираат и кандидати за советници во општинскиот совет“, нагласува Михаилов.

ВМРО-ДПМНЕ во Охрид е во посебна ситуација. Има повеќе советници од СДСМ, но нема градоначалник. Раководството на ВМРО-ДПМНЕ го обвинува СДСМ дека создава катастрофална слика за Охрид и гарантира промени што ќе бидат суштинска спротивност на сегашната состојба.