Распишан нов конкурс за Градска куќа

Градските власти бараат идејно решение за Градска куќа, иако пред три години Министерството за култура избра такво решение. И покрај тоа што надлежните тогаш не доделија прва награда, трудот на Коста Мангаровски го избраа како најблизок до бараните критериуми. Токму објектот Градска куќа претставен според идејата на Мангаровски е дел и од визуелизацијата на „Скопје 2014“. Зградата е лоцирана на плоштадот „Македонија“ и претставена како дел од комплекс во кој покрај резиденција на градоначалникот и матична служба, предвиден е и елитен хотел.

Од Градот Скопје вчера не објаснија зошто распишуваат идејно решение за објект за кој веќе постои избран модел. Случајот дополнително е нејасен ако се има предвид дека во јавниот повик на Градот не е наведена локацијата каде што би се градел објектот, туку само е посочено „на предвидената“ локација и тоа со површина од 2.367 квадратни метри. Предвидено е објектот да има приземје и пет ката, со дозволена максимална висина до 21 метар. Градските власти од идејниот творец на новата административна зграда не инсистираат на посебни услови за изгледот на фасадата, единствено бараат во идејното решение да се испланирани 153 паркинг-места. (Дс.Т.)