Антимакедонец - професија на Божидар Димитров

Ако порано никој не им даваше големо значење на изјавите на Димитров, тие сега треба да се сфатат многу сериозно, зашто доаѓаат од официјално место

Министерот за дијаспора на најистурената позиција во антимакедонската кампања на Софија

Виктор Цветаноски

Македонската јавност сигурно долго време ќе ги слуша од Софија антимакедонските изјави на Божидар Димитров и тој често преку екраните ќе биде присутен во нашите домови. Ако порано беше слободен стрелец во негирањето на се' што е македонско, сега неговите ставови добија официјален карактер. Со неговиот избор за министер без портфељ во новата влада на Бојко Борисов, задолжен за дијаспората, официјална Софија очигледно се определи за офанзивна политика во присвојување на нашето минато и негирање на македонскиот идентитет.

Кој е, всушност, Божидар Димитров, кој цело време е на најистурената позиција во антимакедонската кампања на Софија? На македонската јавност и' стана познат уште пред повеќе од десетина година кога, заедно со Красимир Каракачанов, го промовира познатиот водич за Охрид за нивните туристи да не ги слушаат наводните лаги на охридските водичи кога ќе го посетуваат „својот Ерусалим“, како што го нарекуваат македонскиот древен град.

Димитров подоцна ја отпечати книгата „Десетте лаги на македонизмот“, која пред неколку години Софија ја преведе на англиски и им ја делеше на европарламентарците. Непосредно потоа тој објави слична книга со антимакедонски ставови и не ја промовира во Софија, туку среде Македонија, во Кавадарци, фалејќи се притоа дека ќе му даде награда од милион евра на секого што ќе му покаже историски документ во кој се споменува името Македонец. Истовремено, на една приватна телевизија во својата емисија секоја недела канеше гости да плукаат на Република Македонија и на Македонците.

И не само тоа. Сета врева што во последно време ја креваат бугарските европарламентарци во Европскиот парламент околу бугарските гробишта кај нас е негово масло. Манипулирајќи со факти од минатото, тој поведува иницијативи за возобновување на спомениците што повеќе ги нема, а кои беа подигнати за време на окупацијата на Македонија. Тоа беа споменици на војници на бугарската војска кои гинеа за време на Балканските и Првата светска војна, кога Македонија беше парчосана.

Димитров особено се експонираше при нападите на Македонците во Бугарија, ставајќи се во служба на софиската ВМРО. Остана запаметена и неговата изјава дека Бугарија, конечно, без крв, ја добила третата балканска војна за Македонија откако многумина македонски момчиња и девојки се запишаа на тамошните факултети, а неколку десетици илјади млади луѓе побараа и добија бугарски пасоши.

Ова се само некои антимакедонски бисери на Димитров на кои се надоврзува и неговата неодамнешна глупава изјава дека во Македонија има 1,4 милиони Бугари кои, поради притисоците на власта, не можеле да ја искажат својата вистинска национална свест и дека Македонците имале проблем со идентитетот и затоа ги напаѓале соседите.

За историчарот Божидар Димитров неговите софиски колеги немаат високо мислење. Објективните историчари сметаат дека тој често импровизира и измислува факти и бројки кога говори за македонското минато. Наспроти тоа, таквото негово антимакедонско однесување им годи на политичарите и на новинарите на кои тогаш кога треба да ја нападнат Македонија, секогаш им стои на располагање најголемиот македономрзец, како што го нарекуваат некои.

За тоа кој е вистинскиот Божидар Димитров и за неговите морални принципи најдобро говори начинот како дојде до министерската фотелја. Тој до неодамна беше во најтесното партиско раководство на бугарските социјалисти. Тие и го поставија двапати за директор на Бугарскиот национален музеј. Беше член и на последниот состав на Вишиот партиски совет на БСП. Бугарски извори тврдат дека дента кога партијата ги составувала листите на кандидатите за пратеници, го напуштил состанокот и му се придружил на Бојко Борисов, кој го ставил за носител на листата. Така, откажувајќи се од својата партија, станал министер во новата влада.

Неговите амбиции биле да стане министер за култура, но не успеал во тоа зашто таа функција ја посакал и познатиот бугарски скулптор Вежди Рашидов. Тогаш Бојко Борисов се обидел да го постави за претседател на Комисијата за култура на Собранието, но на таа функција Димитров не можел да биде избран поради тоа што во времето на комунизмот соработувал со службите на државната безбедност на Тодор Живков. По сите перипетии, за да ги задоволи неговите апетити, новиот премиер отворил ново министерско место.

Нема сомнение, Божидар Димитров стана многу влијателна личност во Бугарија, зазеде висока функција од која уште позасилено ќе ја продолжи антимакедонската кампања. Ако порано никој не им даваше големо значење на неговите изјави, тие сега треба да се сфатат многу сериозно, зашто ќе доаѓаат од официјално место. Тоа треба да го разбере и да го сфати и македонската власт и да реагира онака како што и' доликува на секоја власт што ги штити достоинството на државата и угледот на своите граѓани.