За биометриски пасош аплицирале 2.000 иселеници

Со мобилни тимови на МНР во амбасадите се собираат биометриските податоци на македонските иселеници

 Тамара Грнчароска



Мобилните станици на Министерството за надворешни работи ја завршуваат првата фаза од планот на Владата за прием на барањата и земање биометриски податоци од македонските иселеници во странство, кои аплицирале за македонски пасош. Од МНР информираат дека проекциите од околу 2.000 заинтересирани за македонски пасош, во првиот турнус од пет месеци, кој завршува на 31 јули, се исполниле. „Кога почна проектот, беше очекувана бројката од 2.000 пасоши, што, според нас, е голем интерес“, велат од Министерството за надворешни работи.

Оттаму информираат дека планот ќе продолжи од септември, но засега не може да се прецизира кои земји и претставништва ќе ги посетат двете мобилни екипи на МНР, кои бројат по тројца члена. Распоредот ќе зависи од интересот, т.е. од барањата за пасош што ќе пристигнат во меѓувреме, велат од Министерството. Мобилните екипи ги собираат биометриските податоци на барателите во претставништвата, меѓу другото и биометриското фотографирање. По изготвувањето, пасошите преку македонските претставништва ќе им бидат доставени на барателите.

Во турнус, до крајот на мај, во конзулатот во Њујорк стигнале 235 барања од наши иселенициисто, во Чикаго 276, а во Детроит 106 барања за пасош. По американските иселеници најмногу барања за пасоши доставени се во Германија, вкупно 629. Во Австралија, во Мелбурн, пасош побарале 243, а во Канбера 185 македонски граѓани, кои повеќе од шест месеци непрекинато престојуваат таму. Иако Македонија има многубројна дијаспора, во Канада за првите пет месеци аплицирале за пасош само 65 наши иселеници во Торонто. Во Брисел таа бројка е 184, Лондон 138, а во Париз 107.

Формирањето на мобилните тимови Владата пред шест месеци го објасни како одговор на барањата на дијаспората за олеснување и забрзување на процедурата на аплицирањето, но и добивање биометриски пасош за нашите иселеници. Но, претставниците на македонската дијаспора, кои во понеделникот и во вторникот во Скопје со собраа на првата Конференција на иселеничките организации, повторно се пожалија дека се' уште е бавна и развлечена процедурата за добивање државјанство и пасош, што некогаш трае и по неколку години. Тие, спротивно на тврдењата на МНР, велат дека интересот за македонски пасош е мал. Така тристотината барања за биометриски пасош од Австралија, каде што има околу 80.000 Македонци, а според иселеничките организации 200.000, се далеку од тие бројки.

Акцијата на Владата да го олесни добивањето биометриски пасош на нашите иселеници, неофицијално, се поврзува и со подготовките за вклучување на дијаспората во следните парламентарни избори во Македонија. За да се исполни обврската за гласање, нашите иселеници ќе треба да поседуваат валиден документ, т.е. пасош. Дијаспората е заинтересирана за учество на изборите, но бара и измени во Изборниот закон за да им се овозможи електронско гласање или по пошта. Засега Законот предвидува само лично гласање на избирачите.

Досега не е утврдена точната бројка на македонската дијаспора, иако се споменуваат бројки од неколку стотици илјади до милион. Во неколку наврати се правеа обиди преку повици за пријавување на иселениците во македонските претставништва во странство таа да се преброи, но безуспешно.