Потрошувачите имаат права, но не знаат за нив

Граѓаните треба сами да го пријават недостатокот на производите за да ги заменат или за да им се вратат парите

Најголемиот број поплаки на граѓаните се однесуваат на техничка стока

АЛЕКСАНДРИЈА СТЕВКОВСКА

Се' поголем е бројот на потрошувачи кои се оштетени при процесот на набавка на некоја техничка стока, сеедно дали станува збор за обувки, облека или за прехранбени производи. Во земјава има постојан увоз на производи со исклучително низок квалитет. Незадоволството од купените производи или од услугата на трговците потрошувачите не можат да го анулираат во никоја насока, бидејќи во Македонија, за разлика од западните земји, во фирмите нема сектори што се грижат за интересите на купувачите.

Засега потрошувачите можат да ги остварат своите права само преку интервенција на Пазарната инспекција, која постапува согласно со Законот за заштита на потрошувачите, но малкумина знаат дека самите треба да го пријават недостатокот на производите откако продавачите не им излегле во пресрет. Производот може биде заменет или да му бидат вратени парите дадени за тој производ. Што се однесува, пак, до некоректниот однос на давателите на услуги или трговците кон купувачите, засега се' уште никој не може да го санкционира тоа.

„Можеби дваесетина пати се јавував кај Интернет-операторот за да се информирам како да добијам лозинка за проверка на потрошените средства, но никој не се јавуваше цел ден. По 20 часот, пак, уште помалку може да се добие некого на линија, иако се рекламираат дека даваат 24-часовна техничка поддршка. Откако едвај некако стапив во контакт, ми дадоа лозинка која се покажа како тотално неупотреблива, за на крај да ми биде кажано дека има проблеми, бидејќи сум нов во системот. Сега не знам колку имам потрошено од пакетот што го зедов, а претпоставувам дека целата игра е да ме префрлат на другиот пакет со постојан Интерент, кој патем речено и повеќе чини“, вели Васил Лазовски, корисник на услугите на Интернет-провајдер.

Што се однесува до можноста за интервенирање од надлежните служби, а во интерес на потрошувачите, таа е најприсутна кај техничката стока.

„Најголем број интервенции има кај техничките стоки кога се под гаранција, а во Законот за заштита на потрошувачите стои дека по три сервисирања на производите, трговецот е должен да му ги врати парите на потрошувачот. Инаку, бројот на пријави од потрошувачите до некоја фирма за стока што е купена во последниве две години се зголемува, но, сепак, потребно е повисоко ниво на информираност и навремена реакција за да можеме да дејствуваме на терен“, вели директорот на Државниот пазарен инспекторат, Владимир Кочовски.

Најчесто предмет на пријавување се недостатоци регистрирани кај мобилните телефони, но има и за бела техника, а како најскап пријавен производ за интервенирање е неквалитетен автомобил.

Законот за заштита на потрошувачите е скроен за потрошувачите и може многу да им помогне, бидејќи во вонсудска постапка се решава проблемот со неквалитетот на производ.

Според Кочовски, овој закон мора да се почитува од страна на трговците или ќе следува затворање на нивните објекти два месеца, но односот на трговците кон потрошувачите, што не е во домен на нивна интервенција, е сплет на повеќе околности, а пред се', паричната немотивираност за работа.

Во Организацијата на потрошувачите на Македонија доаѓаат граѓани што бараат стручна помош откако не успеале сами да го решат проблемот.

„Најголемиот број поплаки на граѓаните се однесуваат на техничка стока, но и на услугите на јавните или на претпријатијата што држат монопол на пазарот, како што се ЕВН, ’Топлификација‘, ’Водовод‘, кои немаат кол-центар. Актуелен е и проблемот со понудите на операторите со кои граѓаните потпишуваат договори, а не се доволно информирани што содржат тие“, вели претседателката на ОПМ, Маријана Лончар.