Претходен број

Скелетот Славе Македонски живеел пред 6.745 години

Староста на скелетот најден во Македонија е утврдена на Универзитетот во Глазгов

ШТИП - Скелетот на човек пронајден минатата зима при археолошките работи на теренот Грнчарица во близина на штипското село Крупиште, кој археолозите и жителите го нарекоа Славе Македонски, е стар 6.745 години. Староста на најславниот скелет најден на терен на Македонија е утврдена во лабораториите на Шкотскиот универзитет во Глазгов.

Археологот м-р Трајче Нацев, под чие раководство се вршеа археолошките истражувања на „Грнчарица“, вели дека во сертификатот од шкотската институција стои и забелешката дека е можно отстапување од најмногу 35 години во плус или во минус во однос на старосната доба.

„Се утврди дека нашиот Славе Македонски е најстариот скелет пронајден на теренот на Југоисточна Европа, а дека археолошкиот локалитет Грнчарица е најстаро археолошко наоѓалиште на стариот континент“, потенцира Нацев.

Овој археолошки локалитет беше откриен во почетокот на минатата година, кога работниците кои градеа цевковод за регионалниот хидросистем „Злетовица“ на трасата по која требаше да минува за Штип, Карбинци, Свети Николе и Лозово наидоа на вреден археолошки материјал. Работите веднаш беа запрени, а археолозите излегоа на самото место откако беше утврдено дека станува збор за подрачје пребогато со археолошки остатоци од неолитот, па наваму. Подоцна трасата беше променета, со што се отвори простор за активен ангажман на нашите археолози кои дојдоа до сензационалното откритие.

Од Заводот за заштита на спомениците на културата и музеј - Штип ја искажуваат својата благодарност кон амбасадата на Англија, која го воспоставила контактот со Универзитетот во Глазгов. За испитувањата во тамошната лабораторија била платена сума од 290 фунти. По потврдата за староста на скелетот пронајден кај Крупиште, работите на овој археолошки богат терен ќе се интензивираат. (И.Б.)